Ейәнсура районы Таҙлар ауылында яугирҙәр иҫтәлегендә обелиск асылды

Урындағы халыҡтың тырышлығы менән Бөйөк Ватан һуғышында һәләк булған батырҙарҙың һәм еңеү яулап ҡайтҡан яҡташтарҙың исемдәре мәңгелләштерелде. “Аныҡ эштәр” проектына ярашлы обелискты төҙөкләндереүгә 300 мең һум аҡса бүленгән.

Ғафури районы Ерек ауылында йәшәүсе хеҙмәт ветераны 95 йәшлек юбилейын билдәләй

Башҡортостандың географик үҙәге - Ғафури районы Ерек ауылында йәшәүсе хеҙмәт ветераны, «Почет Билдәһе» ордены кавалеры Зөлғәнифә Әсфәндиәрова күркәм ғүмер барамын - 95 йәшлек юбилейын билдәләй. Биш бала тәрбиәләп үҫтергән алдынғы сөгөлдөрсөнөң тормош юлы хаҡында тулыраҡ видеояҙмала.

Стәрлетамаҡ районы Васильевка ауылы янында машиналар йөрөшөндә тотҡарлыҡ бар

Стәрлетамаҡ-Салауат трассаһының тимер юл менән киҫешкән урынында ремонт бара. Эштәр бөгөн һәм иртәгә иртәнге 9-ҙан киске 9-ға тиклем була. Ошоға бәйле машиналар юлдың бер генә һыҙатынан йөрөй, тип хәбәр итәләр Транспорт һәм юл хужалығы министрлығынан.

Күгәрсен районы Бикбулат ауылында спорт майҙансығы асылды

Төбәк "Айыҡ ауыл" республика конкурсында “Ҙур ауылдар” номинацияһында 1-се урын яуланы һәм 5 миллион һумлыҡ сертификат тапшырылды. “Яңы объект әүҙем тормош алып барған ауылдаштарыма ҙур бүләк булды”, ти ауылда йәшәүсе Гөлсәсәк Солтанморатова.

Рәсәй мосолмандары Үҙәк Диниә назараты рәйесе Тәлғәт Тажетдинды тыуған көнөн билдәләй

Гәүһәр юбилей. Башҡортостан БашлығыРадий Хәбиров Рәсәй мосолмандары Үҙәк Диниә назараты рәйесе Тәлғәт Тажетдинды тыуған көнө менән ҡотланы. Баш мөфтөйгә бөгөн 75 йәш. Тәлғәт Тажетдин үҙенең бар ғүмерен исламға хеҙмәт итеүгә бағышланған олуғ һәм абруйлы шәхес, ул бөгөн дә тотош илдә милләт-ара татыулыҡты, берҙәмлекте нығытыуға, йәш быуынды дингә өйрәтеүгә тос өлөш индерә.

Башҡортостандың торлаҡ-коммуналь хужалыҡ предприятиелары ҡышҡы осорға әҙерлек һыҙығында

Өфөнөң Орджоникидзе районындағы учреждениела әҙерлек эштәре 95 процентҡа теүәлләгән. Күптән түгел республика башлығы тапшырған өс берәмек техникала ҡышҡа әҙер.

Башҡортостандан контракт төҙөгән Үҙәк хәрби округ яугирҙары тыл райондарында танктарҙа әҙерлек үтә

Башҡортостандан тәүгә контракт төҙөгән Үҙәк хәрби округ яугирҙары тыл райондарында Т-90М танктарында әҙерлек үтә. Күнекмәләр махсус хәрби операция зонаһы полигондарының береһендә ойошторолған. Махсус хәрби операция биләмәһендә тәжрибә туплаған инструкторҙар етәкселегендә хәрбиҙәр танктың төп нөктәләре һәм агрегаттары, ҡорал кәрәк-ярағы һәм япма ҡорамалдары тураһында мәғлүмәт ала.

Әхмәт Дәүләтов исемендәге медицина ротаһы тотош фронтта иң яҡшы йыһазландырылған хәрби подразделение

Башҡортостан полкының Әхмәт Дәүләтов исемендәге медицина ротаһы тотош фронтта иң яҡшы йыһазландырылған, барлыҡ табиптары булған хәрби подразделение. Әле яҡташтарыбыҙ Луганск халыҡ республикаһының Рубежное ҡалаһында тора. Табиптар үҙҙәре лә ут аҫтына инеп яралыларҙы ҡотҡарыу осраҡтары ла бар.

Өфөлә йәшәүсе ханым махсус хәрби операцияла ҡатнашыусыларға бейәләйҙәр һәм йөн ойоҡбаштар бәйләй

Яугирҙарға күңел йылыһы. Өфөлә йәшәүсе Дания Гәрәйшина махсус хәрби операцияла ҡатнашыусы ир-егеттәргә бейәләйҙәр һәм йөн ойоҡбаштар бәйләй. Күҙ нурҙарын түгеп әҙерләгән ярҙамды ул алғы һыҙыҡҡа ла оҙатҡан. 9-сы тиҫтәһен ваҡлауға ҡарамаҫтан, оло йәштәге ханым изге эшен дауам итә. Әле Башҡортостанда яугирҙар өсөн йөҙөнсө гуманитар ылау туплана, хәрби операцияла ҡатнашыусылар өсөн йылы әйберҙәр, йоҡо тоҡтары, тимер мейестәр йыйыла. Күңел йылыһы менән бәйләгән әйберҙәр яугирҙәр өсөн үтә лә кәрәкле.

Башҡортостанда һирәк осраған дарыу үләндәре производство шарттарында үҫтерелеүе ихтимал

Әле белгестәр ҡиммәтле биологик актив матдәләр етештереүсе үҫемлектәрҙең төклө тамырҙарын үҫтереү менән шөғөлләнә. Өфө фән һәм технологиялар университеты лабораторияһында ҡулланылған биотехнологик ысул хаҡында репортаж.

Хәйбулла районы Аҡъяр үҙәк дауаханаһында яңы медицина ҡорамалы ҡулланыла

Һанлы маммография аппараты “Һаулыҡ һаҡлау” милли проектының беренсел медицина звеноһын яңыртыу программаһы буйынса алынған. Әлеге ваҡытта унда 900-ҙән ашыу ҡатын-ҡыҙ тикшереү үткән.

Башҡортостанда хәрби хәрәкәттәр инвалидтары өйҙә бушлай социаль хеҙмәттәр алыу хоҡуғына эйә

Дәүләт Йыйылышы- Ҡоролтай депутаттары “Граждандарҙы социаль хеҙмәтләндереү тураһында” законға үҙгәрештәр әҙерләй. Ҡанун проектында өйҙә бушлай социаль хеҙмәттәр алыусылар категорияһына хәрби хәрәкәттәр инвалидтарын индерергә тәҡдим ителә.

Рәсәйҙең һәм Башҡортостандың халыҡ артисы Нурия Ирсаеваның тыуған көнө

Билдәле сәхнә йондоҙона бөгөн 81 йәш тула. Нурия Ирсаева театр һөйөүселәренә төрлө образдарҙы уңышлы һынландырыусы актриса булараҡ таныш. Улар араһында "Тапшырылмаған хаттар" спектаклендә - Ғәлиә роле, "Мөхәббәт ҡарағы"нда Фаягөл, "Бәхет хаҡы”нда Әминә. Һәр нәмәлә уңыш сере мөхәббәттән килә, ти Нурия Ирсаева.

Өфө районында милли проект буйынса 15 миллион һумға мөһим юл ремонтланды

Транспорт һәм юл хужалығы министрлығынан хәбәр итеүҙәренсә, Дим – Затон трассаһы тәртипкә килтерелде. Ветошников ауылы янында 1,3 километрлыҡ арауыҡта яңы асфальт түшәлде. Быйыл “Хәүефһеҙ сифатлы юлдар” милли проектына ярашлы Өфө һәм Стәрлетамаҡ ҡалалары янында 37 километр оҙонлоҡта юлдар ремонтлана.

Башҡортостан халҡы коммуналь хужалыҡ мәсьәләләрен смартфон аша хәл итә ала

Республика Хөкүмәтендә “Дәүләт хеҙмәттәре. Йорт” тигән мобиль ҡушымтаны ҡулланыу мәсьәләләре ҡаралды. Уның ярҙамында иҫәпләгес күрһәткестәрен тапшырырға, торлаҡ-коммуналь хеҙмәт өсөн түләргә, капиталь ремонт барышын күҙәтергә, дөйөм йорт йыйылыштарында ҡатнашырға, идарасы компаниялар күрһәткән хеҙмәттәрҙе баһаларға, планлы төҙөкләндереү эштәре теҙмәһе менән танышырға була. Йыл аҙағынаса яңы мобиль сервисҡа 96 меңдән ашыу кеше ҡушылыуы көтөлә. Торлаҡ-коммуналь хужалыҡ министрлығы, ҡала һәм район етәкселегенә электрон системаға күп фатирлы йорттарҙы теркәү бурысы ҡуйыла.

Өфөлә “Ҡаршылыҡтарҙы үтеп” тигән Бөтә Рәсәй форум-күргәҙмәһе ойошторола

Мәртәбәле сарала мөмкинлектәре сикләнгән кешеләрҙең йәшәү сифатын үҫтереүҙә инновацион алымдар тәҡдим ителә. Күргәҙмәлә 11 төбәктән 40 компания ҡатнышырға теләк белдергән. Инвалидлыҡты иҫкәртеү һәм реабилитация мәсьәләләренә арналған форум былтыр беренсегә уҙғарылды. Ул йәмғиәттә ҙур ҡыҙыҡһыныу уятты. Икенсе форум киләһе аҙнала “Торатау” Конгресс-холында үткәрелә. Уның барышында хәйриә йәрминкәһе, “Ҡаршылыҡтарҙы үтеп” тигән балалар ижады конкурсы гала-концерты ла ойошторола.

Башҡортостанда 129 медицина хеҙмәткәренә “Ауыл табибы” программаһы буйынса сертификат тапшырылған

Республика Хөкүмәтендә һаулыҡ һаҡлау тармағында кадрҙар мәсьәләһе ҡаралды. “Ауыл табибы” программаһы буйынса бюджеттан 144,5 миллион һум күсерелгән. Бынан тыш, “Ауыл фельдшеры” программаһына ярашлы, 33 белгескә 16,5 миллион һум түләнгән. Быйылдан республикала ауыл йәки бәләкәй ҡалаларға эшкә ҡайтҡан участка табиптарына 3 миллион һум бирелә. Бының өсөн бюджетта 50 миллион һум һалынған.

Башҡортостанда 40 меңдән ашыу йортҡа газ торбалары һуҙылған

Рәсәй Президенты Владимир Путин ҡушыуы буйынса 2021 йылда яңы программа иғлан ителде. Уға ярашлы, шәхси йорттарға тиклем газ торбаһы бушлай еткерелә. Әле республикала 30 мең йортҡа “зәңгәр яғыулыҡ” үткән. Бынан тыш, Башҡортостанда айырым төркөмгә ҡараған кешеләргә сертификат бирелә. Документ ярҙамында йортто газға тоташтырырға була.

Башҡортостанда 2 мең ярым ғаилә колледждарҙа балаларын уҡытыуға тәүге тапҡыр компенсация ала

Был турала Республика хөкүмәте ултырышында белдерелде. Дәүләт ярҙамы күп балалы ғаиләләр өсөн ҡаралған. Түләүле нигеҙҙә урта һөнәри белем алған өсөн компенсация бирелә. Ул хаҡтың 50 процентын ҡаплай. Аҡса уҡыу йылы аҙағында күсерелә. Тәүге түләүҙәр киләһе йылдың йәйендә була.

Өфөлә Көнсығыш юл төҙөлөшө өсөн федераль ҡаҙнанан өҫтәмә аҡса бүленә

Был турала ил хөкүмәте ултырышында белдерелде. Өфө Орел Калининград, Волгоград, Хасавюрт һәм Яр Саллы ҡалаларындағы объекттар өсөн тағы 60 миллиард һум йүнәлтелә. Премьер-министр Михаил Мишустин белдереүенсә, эштерҙе ваҡытынан алда тамамлау мөмкинлеге бар, проекттар урындарҙа социаль-иҡтисади үҫеш өсөн ҙур әһәмиәткә эйә. Өфөлә Көнсығыш юл төҙөлөшө буйынса план 77 процентҡа үтәлгән.

Башҡортостанда баҡса маршруттары тиҙҙән ябыла

23 октябрҙән "Башавтотранс" автобустары баҡсаларға йөрөмәй башлай. Компаниянан хәбәр итеүҙәренсә, баҡсасыларҙың күбеһе - пенсионерҙар. Уларға юл өсөн ташлама ҡаралған. Баҡса маршруттар яҙын баҡса эштәре башланғас асыла, көҙөн уңыш йыйғандан һуң ябыла.