تارت الدجاج 🤤♥️

الطريقة العجينة
كوبين ونص دقيق ، تلاتة ملاعق كبيرة زبده لينه، علبه زبادي ساده، ملعقة ممسوحة كبيرة خميره بيره ، ملح ، تعجن بماء دافي ، خليها تخمر وبعدين شكليها

الحشوة
مكعبات دجاج مع شرايح بصل شوحتها ف الزيت ، وبعدها ضفت ثومة وطماطم وفلفل اخضر ، وخليها على نار هادية، ولما قريب يطيب، ضيفي توابك من ملح وفلفل ، زنجبيل ، تابل تونسي ، توابل الدجاج المعتادة ، واحشي بيها التارت وشكلي حسب الرغبه

وصحتين عليكم ♥️🕊

السينابون ♥️🤤

الطريقة
كوب حليب دفيه يكون فاتر مش سخون ، ودوبي فيه ملعقتين زبده ، وحطي فنجان سكر ، بيضة ، وضربيهم كويس لين يتخلطو مع بعض ، بعدين ضيفي ملعقتين حليب بودره ، ملعقتين نشأ، ظرف بينج باودر ، ملعقتين خميره ،
الدقيق شوفي بعينك لين تتماسك معاك العجينة ، تكون رطبه لكن مش سائلة ، اعجني كويس ، وخليه يخمر ، وبعدين افردي العجينة ، ادهنيه ب الزبدة ورشي والقرفة والكاكاو ، وقطعيه وخليه يخمر تاني ف الطاجين

صوص السينابون

علبة حليب محلى ، عليه فيلادلفيا او 5 مكعبات جبنة كيري ، او اي نوع جبه عندك ، ملعقتين كبار بودرة كريم شانتي

وصحتين عليكم ♥️

بسكويت السكر والقرفة الجميل ♥️🤤

الطريقة
كوب زبده ، كوب سكر ناعم ، كوب زيت ، بيضين ، فانيليا، كوب نشأ ، ظرف B.k ، بالنسبة للدقيق كل واحد ونوع اللي عنده ضيفي الدقيق ولمي العجينة ، لين تحسيها ساهلة تشكيل ، وخليها شوية ، وبعدين حليها ، وشكلي ب الفومة ، وحطيها ف الكوشة ، من تحت 20 دقيقة ، من فوق 10 دقايق ولا اقل ، وبعد مااطلعيه من الكوشة غطيه ب السكر والقرفة وألف صحة وهناء عليكم ♥️

طريقة الكيكة الاسفنجيا♥️
6 بيضات ، كوب سكر ، كاشيك فانيليا وكاشيك خل ، ضربيهم ربع ساعة كاملة مع بعض لين يولو كريمة ، وبعدين ضيفي عليهم نص كوب زيت ، ونص كوب حليب ، كوب دقيق ونص كوب كاكاو وملعقة كبيرة B.K غربليهم تلاتة مرات مع بعض ( هادي النقطة مهمة) ضيفيهم وحركيهم مع بعض بهدوء ، بعدين ادهنيه الطاجين بزبدة ورشي عليه دقيق وحطيه ف الكوشة ( تكون سخونة طبعا ) على 150 ، الافضل اطيباها قبل ماتحشها بيوم

وبعدين شربيها ب:
كوب سكر على النار وكوبين ميه خليهم يغلو عشرة دقايق وبعد مايغلو على النار ضيفيلهم كاشيك نسكافي

الحشوات ♥️
الحشوة الاولة :حشوة نوتيلا
نوتيلا، وكريم شانتي ، ولوز

الحشوة التانية : حشوة البندق
حشوة البندق جاهزة خديتها ، كريم شانتي ، بندق محمص

الحشوة التالتة: حشوة الفستق
جاهزة ، كريم شانتي ، حشوة الباونتي معاها ♥️

وبعدين لبسوها بكريم شانتي ، طبقة خفيفة وحطوها ف الفريز حتى ساعة ، وبعدين طلعوها لبسوها بكريم شانتي نخلط مع كاشيك نوتيلا

القناش الفوق الكيكة
كريمة سائلة سخنيها على النار ، وضيفيلها كاشيك نوتيلا ، وحركيها لين تبرد وتقدري تزيني بيها الحواشي
اي حاجة مش واضحة غدوا نفتح صارحني واسألوني ♥️