በአንድ ጀምበር 500 ሚሊዮን ችግኝ ተከላ ለሁለተኛው ምዕራፍ አረንጓዴ አሻራ ታሪካዊ አስተዋጽኦ ያበረክታል

👉 ለ500 ሚሊዮን ችግኝ በአንድ ጀምበር ለሚደረገው ተከላ 9ሺህ 500 ቦታዎች ተዘጋጅተዋል፣

👉 ለዘንድሮ የአረንጓዴ ዐሻራ እስካሁን 6.4 ቢሊዮን የችግኝ መትከያ ጉድጓድ ተቆፍሯል፣

********
(ኢ ፕ ድ)

በአንድ ጀምበር 500 ሚሊዮን ችግኝ ለመትከል የሚደረገው መርሐግብር ምን ያህል ችግኝ እንደተተከለ፣ በተከላው የተሳተፈውን የሰው ኃይልና የተሸፈነውን መሬት የሚያሳይ የካርታ ዝግጅት ከባለድርሻ አካላት ጋር በመተባበር መዘጋጀቱን ፕሮፌሰር ኢያሱ ተናግረዋል፡፡

የመጀመሪያውን ምዕራፍ በስኬት በማጠናቀቅ ወደ ሁለተኛው ምዕራፍ የተሸጋገረው የአረንጓዴ አሻራ ልማት የምዕራፉን የመጀመሪያ አመት ስራ በስኬት ለማጠናቀቅ ሰፊ ማህበረሰብ አቀፍ ስራዎች እየተከናወኑ ነው፡፡

በዘንድሮው አመት 6.5 ቢሊዮን ችግኝ በሁሉም የአገሪቱ ክፍሎች ለመትከል ሰፊ ስራ እየተሰራ ሲሆን ይህን ለማሳካት ከሚከናወኑ ተግባራት መካከል አንዱ ‹500 ሚሊዮን ችግኝ በአንድ ጀምበር› ለመትከል የሚደረገው መርሐግብር ነው፡፡

በዚህ አመት ለሚከናወነው የአረንጓዴ አሻራ ችግኝ ተከላ መርሃ ግብር ሰፊ የችግኝ ዝግጅት ከመደረጉ ባለፈ እስካሁን 6.4 ቢሊዮን የችግኝ መትከያ ጉድጓድ መቆፈሩን የግብርና ሚኒስትር ዴኤታ ኢያሱ ኤሊያስ/ፕሮፌሰር/ 500 ሚሊዮን ችግኝ በአንድ ጀምበር ለሚደረገው ተከላ 9500 ቦታዎች እንደተዘጋጁና ይህም 361415 ሄክታር መሬት እንደሚሸፍን ተናግረዋል፡፡

በሁለተኛው ምዕራፍ የአረንጓዴ አሻራ ችግኝ ተከላ ለጥራት፣ ለፍራፍሬና ለአገር በቀል ዝርያዎች ልዩ ትኩረት የሚሰጥ ሲሆን 60 በመቶ የጥምር ደን እርሻ፣ 35 በመቶ የፍራፍሬ እንዲሁም 5 በመቶ ለከተማ ውበት የሚሆኑ ዘርፈ ብዙ ችግኞች ናቸው፡፡

በመሆኑም 500 ሚሊዮን ችግኝ በአንድ ጀምበር እነዚህን ታሳቢ ባደረገ መልኩ የሚተገበር ይሆናል፡፡ በመሆኑም ሁሉም የመስራት አቅም ያለው የማህበረሰብ ክፍል በዚህ ታሪካዊ ምዕራፍ አሻራውን ማስቀመጥ እንዳለበት ፕሮፌሰር ኢያሱ መግለፃቸውን የግብርና ሚኒስትቴር አስታውቋል።

የአረንጓዴ አሻራ መርሃ ግብር ዘርፈ ብዙ ጠቀሜታ እየሰጠ ሲሆን በአካባቢ ጥበቃ፣ ኢኮኖሚያዊ ተቀሜታ፣ ስራ እድል ፈጠራና ለአገር ገፅታ ግንባታ የጎላ ድርሻ አበርክቷል፡፡

የለሚ ናሽል ሲሚንቶ ፋብሪካ ግንባታ 65 ከመቶ ደርሷል
****************
(ኢ.ፕ.ድ)

በአማራ ክልል ሰሜን ሸዋ ዞን በሁለት ነጥብ ሁለት ቢሊዮን ዶላር እየተገነባ የሚገኘው የለሚ ናሽናል ሲሚንቶ አክሲዮን ማህበር የኢንዱስትሪ ኮምፕሌክስ ግንባታ 65 ከመቶ መድረሱ ተገለፀ፡፡

የአማራ ክልል የኢንዱስትሪና ኢንቨስትመንት ቢሮ የአዲስ አበባ ማስተባበሪያ ፅህፈት ቤት ኃላፊ አቶ ያየህ አዲስ ለኢትዮጵያ ፕሬስ ድርጅት እንደገለፁት፤ የፋብሪካው ግንባታ እየተፋጠነ ነው። አስፈላጊ የሚባሉ ማሽኖችም ከቦታው እየደረሱ ነው፡፡

በአሁኑ ወቅት 3000 ዜጎች የስራ ዕድል የተፈጠረላቸው ሲሆን፤ አንድ ሺህ 500 ቻይናውያን በፋብሪካው ግንባታ ላይ እየተሳተፉና የዕውቀት ሽግግር እየተፈጠረ መሆኑንም አብራርተዋል።

የፋብሪካው ግንባታ በሚቀጥለው ዓመት ተጠናቆ ምርት እንደሚጀምርም አቶ ያየህ ገልጸዋል።

የለሚ ናሽናል ሲሚንቶ አክሲዮን ማኅበር የኢንዱስትሪ ኮምፕሌክስ በኢስት አፍሪካን ሆልዲንግ እና በቻይናው ዌስት ቻይና የሲሚንቶ አምራች ኃላፊነቱ የተወሰነ ኩባንያ ሽርክና የተመሰረተ ነው፡፡

ሐምሌ 4 ቀን 2015 ዓ.ም
በክፍለዮሐንስ አንበርብር

በጊቤ 3 የኃይል ማመንጫ ጣቢያ ላይ ባጋጠመ እክል በአብዛኛው የሀገሪቱ አካባቢዎች ኤሌክትሪክ ተቋርጧል
**
(ኢ ፕ ድ)
የኢትዮጵያ ኤሌክትሪክ ኃይል ችግሩን ለመፍታት ባደረገው ርብርብ በአዲስ አበባ ተቋርጦ የነበረው ኤሌክትሪክ አገልግሎት ወደ ነበረበት ተመልሷል።

በተቀረው የሀገሪቱ ክፍሎች ያጋጠመውን የኤሌክትሪክ መቋረጥ ችግር ለመፍታት ተቋሙ ከፍተኛ ጥረት እያደረገ መሆኑን ለኢቢሲ አስታውቋል።

ትናንት ምሽት በሃገሪቱ በረካታ አካባቢዎች ተቋርጦ የነበረው የኃይል አቅርቦቱ ወደነበረበት ተመልሷል
*********************
(ኢ ፕ ድ)

በጊቤ 3 የኃይል ማመንጫ ጣቢያ ላይ ባጋጠመ የቴክኒክ ችግር ምክንያት በበረካታ የሃገሪቱ አካባቢዎች ተቋርጦ የነበረው የኃይል አቅርቦቱ ወደነበረበት ተመልሷል፡፡

ተቋርጦ የነበረው የኃይል አቅርቦት ወደነበረበት የተመለሰው በማመንጫ ጣቢያው ላይ ያጋጠመውን የቴክኒክ ችግር ለማስተካከል በተደረገ ከፍተኛ ጥረት ነው፡፡

የተፈጠረው ችግር እስኪፈታ ድረስ በትግዕስት ለተጠባበቃችሁ ክቡራን ደንበኞቻችን ከፍ ያለ ምስጋና እናቀርባለን ብሏል የኢትዮጵያ ኤሌክትሪክ አገልግሎት።

በጊቤ 3 የኃይል ማመንጫ ጣቢያ ላይ ባጋጠመ የቴክኒክ ችግር ምክንያት በበረካታ አካባቢዎች የኃይል መቋረጥ ማጋጠሙን ይታወሳል።

ሐምሌ 5 ቀን 2015 ዓ.ም