#ኢፕድ_ድንቃድንቅ‼️
ታምረኛው ቤተሰብ ‼️

ከወደ ፓኪስታን “ተዓምር ነው” የተባለ ዜና ተሰምቷል፡፡ ዜናው ፓኪስታናዊያንን ብቻ አስገርሞ አልቀረም።

ይልቁንም ጉዳዩ እንግዳ ነገር በመሆኑም ጭምር በዓለም ድንቃድንቅ መዝገብ ላይም “አጃኢብ” ተበሎ ሰፍሯል።

ነገሩ እንዲህ ነው። ጥንዶቹ በፓኪስታን ላርካና ነዋሪ ናቸው፡፡ ባልና ሚስቱ አሚር አሊና ከዲጃ ይባላሉ፡፡ የሁለቱም የልደት ቀን ተመሳሳይ ነው፤ እአአ ኦገስት አንድ፡፡

ጥንዶቹ ይህን ልዩ ቀን ታሪካዊ ለማድረግ አሰቡ፡፡ መላም ዘየዱ፡፡

አደረጉትም። በልደት ቀናቸው በአንድ ጣሪያ ስር ለመኖር ወስነው በጎርጎሮሳዊያኑ የጊዜ ቀመር ኦገስት 1 ቀን 1991 በልደት ቀናቸው ተጋቡ።

በተጋቡ ልክ በአንድ አመታቸው ቤታቸው በልጅ ተባረከ። በባልና ሚስቱ የልደት ቀንና የጋብቻ ቀን መመሳሰል የተጀመረው ግጥምጥሞሽ ወደ በኩር ልጃቸውም ተሻገረ።

ጥንዶቹ የመጀመሪያ ልጃቸውን በልደት ቀናቸው ወለዱ። ስሟንም ሲንዶ አሏት።
የጥንዶቹ ተዓምር የሚመስል ህይወት በዚህ አላበቃም፡፡

የአምላክ ድንቅ ስራ በዚህ ቤተሰብ ቀጥሎ፤ ጥንዶቹ ሁለት መንታ ሴት ልጆችን አሁንም በተመሳሳይ የልደት ቀናቸውን በሚያከብሩበት ኦገስት 1 ወለዱ። ተገረሙ፤ ብዙዎችንም አስደመሙ።

የቤተሰቡ ታምራት እንደቀጠለ ነው።
ባልና ሚስቱ ሌለ መንታ ወንድ ልጆችን አቅፈው ሳሙ። እነዚህ መንታ ወንድማማቾችም ይህችን ምድር የተቀላቀሉት እህቶቻቸው በተወለዱበት ወላጆቻቸው ደግሞ በተወለዱበትና በተጋቡበት ቀን መሆኑ ግርምቱን ከፍ አደረገው።

ጥንዶቹ በአምላክ ስራ እየተገረሙም እየተደነቁም የራሳቸውንና የአምስቱን ልጆቻቸውን ልደት በተመሳሳይ ቀን እያከበሩ ኑሯቸውን መግፋት ቀጠሉ።

የቤተሰቡ ታምር በዚህ እንዲቋጭ አልተፈለገምና ጥንዶቹ ዳግም ሁለት ሴት ልጆችን አከታትለው ወለዱ።

የሚገርመው ታዲያ ሁለቱም በተለያየ አመት ይወለዱ እንጂ የተወለዱበት ቀን ግን እንደ ቤተሰቡ ሁሉ ተመሳሳይ ነበር፤ ኦገስት 1።
ስለዚህ ጉዳይ ሲጠየቅ አባት አሚር አሊ ስለመደነቁና መደሰቱ ይናገራል፡፡

ባለቤቱ ከዲጃም ሁልጊዜ ድንቅና ስኬታማ ስለሆነው የወሊድ ታሪክ እንደምትደነቅ ተናግራለች። ባልና ሚስቱ ይሄን ጉዳይ ከፈጣሪ የተሰጠ ድንቅ ስጦታ አድርገው ተቀብለውታል፡፡

የአለም ድንቃድንቅ መዝገብም ገዳዩን ሰምቶ ብቻ ማለፍአልፈለገም። በዚህ ጉዳይ ላይ ከዚህ ቀደም የተመዘገበ ነገር እንዳለ መለስ ብሎ አጣራ።

ከእነዚህ ቤተሰቦች ቀድሞ አሜሪካውያን የአምስት ቤተሰብ አባላት ተመሳሳይ የልደት ቀን ኖሯቸው መዝገቡ ላይ ሰፍረው ተገኙ። ሆኖም ፓኪስታናዊያኑ ዘጠኝ በመሆናቸው በድንቃድንቅ መዝገቡ ላይ ከመስፈር ያገዳቸው አልነበረም።

አጫጭር የቪዲዮ መረጃዎችን ለማግኘት ሊንኩን ይጫኑ

https://www.tiktok.com/@ethiopianpressagency...
ሐምሌ 6 ቀን 2015 ዓም
በዳግማዊት ግርማ