የአዲስ አበባ ከተማ አስተዳደር የ2015 በጀት አመት የሥራ አፈጻጸም ግምገማ እያካሄደ ነው
***************
(ኢ ፕ ድ)
የአዲስ አበባ ከተማ አስተዳደር የ2015 በጀት አመት የስራ አፈጻጸም ግምገማ በአዳማ ከተማ እያካሄደ ነው።
በግምገማ መድረኩ ንግግር ያደረጉት የአዲስ አበባ ከተማ ከንቲባ አዳነች አቤቤ በበጀት አመቱ በተሟላ ደረጃ ስኬታማ ስራዎች መከናወናቸውን ገልጸዋል።

አመራሩ ተደራራቢ ሃላፊነትን በመወጣት ረገድ ትልቅ ተሳትፎ ማድረጉን አስታውቀዋል።

ከንቲባዋ፣ የበጀት አመቱ የሃሳብና የተግባር አንድነት የታየበት፣ መገፋፋቶች የቀነሱበትና ወንድማማችነትና እህትማማችነት ጐልቶ የታየበት አመት እንደነበር ገልጸዋል።

የአመራር ውህደትና አንድነት፣ ደጋፍና ክትትል ለህዝብ ጥቅም በትኩረት መስራት የስኬቱ ምንጭ ነበር ያሉት ከንቲባዋ፣ በበጀት አመቱ በዋናና መሰረታዊ ፍላጐት ላይ ያተኮሩ ከ12ሺ በላይ ፕሮጀክቶችን መፈጸም እንደተቻለ ተናግረዋል።

በአዲሱ ገረመው (አዳማ)
ሐምሌ 29 ቀን 2015 ዓም

የቅዱስ ጳውሎስ ሆስፒታል ሚሌኒየም ሕክምና ኮሌጅ 583 ዶክተሮችን አስመረቀ
***************
(ኢ.ፕ.ድ)

የቅዱስ ጳውሎስ ሆስፒታል ሚሌኒየም ሕክምና ኮሌጅ በቅድም ምረቃናና ድህረ ምረቃ 583 ዶክተሮችን ዛሬ አስመረቀ።

በምረቃ ስነስርአቱ ላይ የፕላንና ልማት ሚኒስትር ዶክተር ፍጹም አስፋ፣ የጤና ሚኒስትር ዴኤታ ዶክተር ደረጄ ድጉማና ሌሎች እንግዶች ተገኝተዋል።

በ"ሰብስፔሻሊቲ፣ በነርሲንግ ስፔሻሊቲ፣ በፐብሊክ ሄልዝ፣ በሌሎች ዘርፎች አስመርቋል።

የኮሌጁ ፕሮቮስት ዶክተር ሲሳይ ሰርጉ እንዳሉት፤ ቅዱስ ጳውሎስ ሆስፒታል ሚሌኒየም ሕክምና ኮሌጅ ጥራቱን የጠበቀ የጤና አገልግሎት ለመስጠት፣ ብቁ የጤና ባለሙያዎችን ለማፍራት ከመማር ማስተማሩ ጐን ለጐን ችግር ፈቺ ምርምሮችን በመስራት የህክምና አሰጣጡ የዘመነ እንዲሆንና በአለም አቀፍ ደረጃ ተወዳዳሪ እንዲሆን እየሰራ ነው።

ኮሌጁ በ35 የስልጠና መርሃግብሮች የህክምና ባለሙያዎችን በማሰልጠን የህክምናው ዘርፍ እንዲዘምን ለማስቻል እየተሰራ መሆኑን የገለጹት ዶክተር ሲሳይ፣ ለአገሪቱ የጤና ስርአት መሻሻል የበኩሉን ሚና እየተወጣ ነው ብለዋል።

ከሚሰጣቸው የስልጠና መርሃግብሮች ሰባቱ በዚህ አመት የተጀመሩ መሆናቸውን ጠቅሰው በቀጣይነትም ምርምሮችን በመስራት የጤና አገልግሎት ተደራሽ እንዲሆን ይሰራል ብለዋል።

ምሩቃን በቀጣይ በኮሌጁ የቀሰሙትን እውቀት በተግባር በመግለጽ ሙያዊ ሀላፊነታቸውን እንዲወጡ ዶክተር ሲሳይ ጥሪ አቅርበዋል።

ኮሌጁ ያስመረቃቸው በህክምና 395፣ በህብረተሰብ ጤና፣ 78፣ በነርስ 110 በድምሩ 583 ሲሆኑ 185ቱ ሴቶች ናቸው።

ከምሩቃኑ መካክል በተሰጠው አገር አቀፍ የመውጫ ፈተና 151ዱ በሙሉ ከፍተኛ ነጥብ በማስመዝገብ ማለፋቸው ተገልጿል።

በሞገስ ተስፋ
ሐምሌ 30 ቀን 2015 ዓ.ም

ግብርና ሚኒስቴር 33 ሚሊዮን ብር ወጪ የተደረገባቸው የወተት ማጓጓዣ ተሽከርካሪዎችን ለክልሎች በድጋፍ አበረከተ
****************
(ኢ ፕ ድ)

ግብርና ሚኒስቴር 33 ሚሊዮን ብር ወጪ የተደረገባቸው ሰባት የወተት ማጓጓዣ ተሽከርካሪዎችን ለክልሎች በድጋፍ አበረከተ።

ተሽከርካሪዎቹ ከዓለም ባንክ በድጋፍ የተገኙ መሆናቸው የተገለጸ ሲሆን የወተት ግብይትን በማሳለጥ የሌማት ትሩፋትን ከግብ እንዲደርስ የሚያግዙ መሆናቸውም ተገልጿል።

ሚኒስቴሩ ያበረከታቸውን ተሽከርካሪዎች ድጋፍ የተደረገላቸው የክልል ግብርና እና እንስሳት ሃብት ቢሮ ሃላፊዎች ተረክበዋል።

ተሽከርካሪዎቹ በድጋፍ የተበረከቱትም ለኦሮሚያ፣ ለአማራ፣ ለደቡብ ብሄር ብሄረሰቦች እና ህዝቦች እንዲሁም ለሲዳማ ክልሎች መሆኑ ተገልጿል።

ተሽከርካሪዎቹ በአንድ ጊዜ 10 ሺህ ሊትር የወተት ምርቶችን ማሰባሰብ እና በተፈለገበት ቦታ ማድረስ የሚችሉ መሆናቸው ተጠቅሷል።

ተሽከርካሪዎቹ ወተት በስፋት የሚያመርቱ አካባቢዎች ላይ አገልግሎት እንዲሰጡ እንደሚደረጉም ተመላክቷል።
በርክክቡ ወቅት ባለፈው በጀት ዓመት በአገር አቀፍ ደረጃ 8 ነጥብ 6 ቢሊዮን ሊትር ወተት መመረቱ ገልጸዋል።

ይህ የሆነው የእንስሳት ማሻሻያ፣ ዝርያ ማሻሻል እና ዘመናዊ ቴክኖሎጂን መጠቀም በመቻሉ እንደሆነ ተመላክቷል።

እንደ ኢዜአ ዘገባ፤ በመጪዎቹ ዓመታትም በአገር አቀፍ ደረጃ 11 ቢሊዮን ሊትር ወተት በዓመት ለማምረት ዕቅድ ስለመያዙም ተጠቁሟል።
ነሀሴ 1 ቀን 2015 ዓም