"አዲሱ በጀት ዓመት ምርታማነት ላይ በማተኮር የዘርፉን አንኳር ሥራዎች የምናሳካባት ይሆናል" ወይዘሮ ሙፈሪሃት ካሚል የሥራና ክህሎት ሚኒስትር
************
(ኢ.ፕ.ድ)

"አዲሱ የበጀት ዓመት ምርታማነት ላይ በማተኮር የዘርፉን አንኳር ሥራዎች የምናሳካባት ይሆናል" ሲሉ የሥራና ክህሎት ሚኒስትር ወ/ሮ ሙፈሪሃት ካሚል ገለጹ።

የሥራና ክህሎት ሚኒስቴር በየደረጃው የታቀዱ ሥራዎችን ውጤት ማላቅ የሚያስችል የዘርፉ አመራሮች የስልጠና እና የምክክር መድረክ "ዓመተ-ምርታማነት" በሚል መሪ ሀሳብ በኢትዮጵያ ፖሊስ ዩንቨርስቲ ዛሬ ተጀምሯል፡፡

የሥራና ክህሎት ሚኒስትሯ ወ/ሮ ሙፈሪሃት ካሚል እንደገለጹት፣ መድረኩ የዘርፉ የሪፎርም ሥራዎች አፈጻጸም የሚገመገምበት እና በአዲሱ በጀት ዓመት ምርታማነት ላይ በማተኮር የዘርፉን አንኳር ሥራዎች ለማሳካት የሚያስችል አቅም የሚገኝበት ይሆናል።

በመድረኩ ከሁሉም ክልሎች፣ ሁለቱ የከተማ አስተዳደሮች እና ከተጠሪ ተቋማት የተውጣጡ ከ600 በላይ ከፍተኛና መካከለኛ አመራሮች በመሳተፍ ላይ ናቸው ፡፡

በአመለወርቅ ከበደ
ነሀሴ 2 ቀን 2015 ዓ.ም

አቶ ደመቀ መኮንን ከኮሪያው የውጭ ጉዳይ ሚኒስትር ጋር ተወያዩ
************
(ኢ.ፕ.ድ)

የኢፌዲሪ ምክትል ጠቅላይ ሚኒስትርና የውጭ ጉዳይ ሚኒስትሩ አቶ ደመቀ መኮንን ከኮሪያ የውጭ ጉዳይ ሚኒስትር ፓርክ ጂን ጋር በሁለትዮሽ ጉዳዮች ላይ ውይይት አድርገዋል።

ከውይይቱ በኋላ በጋራ በሰጡት ጋዜጣዊ መግለጫ ላይ አቶ ደመቀ መኮንን እንደገለጹት፣ በሁለቱ አገራት መካከል ያለውን ግንኙነት ለማሳደግ በሁለንተናዊ ጉዳዮች ላይ ያተኮረ ሰፊ ውይይት አድርገናል ብለዋል።

በኢትዮጵያና ኮሪያ መካከል የቆየውን ዘርፈ ብዙ ዲፕሎማሲያዊ ግንኙነት ለማሳደግ የሚያስችል ፍሬያማ ውይይት ማድረጋቸውንም ገልጸዋል።

በቀጠናዊና በአለም አቀፋዊ ጉዳዮች ላይም ሁለቱ ወገኖች ውይይት ማድረጋቸውን አቶ ደመቀ ተናግረዋል።

ሁለቱ አገራት ዲፕሎማሲያዊ ግንኙነት ከጀመሩ 60 አመት የሞላው በመሆኑ ግንኙነቱን ይበጥ ለማጠናከር መስማማታቸውንም ጠቁመዋል።

በሞገስ ጸጋዬ
ነሀሴ 2 ቀን 2015 ዓ.ም

የብሄራዊ ፍልሰት ትብብር ጥምረት ህገወጥ የሰዎችን ዝውውር በተለያዩ ስልቶች ለመከላከል አቅጣጫ አስቀመጠ
************
(ኢ.ፕ.ድ)

ህገወጥ የሰዎችን ዝውውር በተለያዩ ስልቶች መከላከል ብሎም የዝውውር ሰንሰለቱን በተቀናጀ ህግ የማስከበር ስራ መበጣጠስ በቀጣይ በትኩረት የሚሰራበት ጉዳይ መሆኑን የብሔራዊ ፍልሰት ትብብር ጥምረት አስታውቋል፡፡

ጥምረቱ በአዳማ ባደረገው ግምገማ የፍልስተኞችን መረጃ በአግባቡ መያዝ፣ ኢትዮጵያውያን ዜጎች ለስራ ወደ ውጭ ከሚሄዱባቸው ሀገራት ጋር መፈራረም እና የጥምረቱን ባለድርሻ አካላት ማጠናከር የ2016 ሌላው የትኩረት ጉዳዮቹ ናቸው፡፡

በምስራቅ አፍሪካ የልማት በይነ መንግስታት (ኢጋድ) የሚደገፈው የብሄራዊ ፍልሰት ትብብር ጥምረት የተቋቋመው ፍልሰትን በአግባቡ ለመምራት እና ለማስተዳድር ነው፡፡

እንደ ኢቢሲ ዘገባ፤ በኢጋድ የፍልሰት አስተዳደር አስተባባሪ ሙጂብ ጀማል ድርጅታቸው ጥምረቱን በመደገፍ ኢትዮጵያ በዚህ ዘርፍ የያዘችውን እቅድ እንድታሳካ የተጀመረው ድጋፍ ተጠናክሮ ይቀጥላል ብለዋል፡፡

በአደማ በተካሄደው የጥምረቱ ግምገማ ከውጭ የሚመለሱ ተጎጂዎችን ለመደገፍ ፣ ከአየር ንብረት ለውጥ ጋር ተያይዞ በድንበር አካባቢ ለሚኖር ፍልስት የዜጎችን ደህንነት ለመጠበቅ እና መደበኛውን ፍልሰት በተቀመጠለት ህግ መሰረት ለመደገፍ አንዲሁም ኢመደበኛውን ፍልሰት ለመከላከል የክልልና የፌደራል ተቋማት በትኩረት ለመስራት ከስምምነት ደርሰዋል፡፡