ጠቅላይ ሚኒስትር ዐቢይ አሕመድ የሸበሌይ ሪዞርት ግንባታ ስፍራን ጎብኝተዋል
**************
(ኢ.ፕ.ድ)
ጠቅላይ ሚኒስትር ዐቢይ አሕመድ ዛሬ ጠዋት ከ’ገበታለትውልድ’ የልማት ቁልፍ ስፍራዎች አንዱ ሆኖ በሶማሌ ክልል የሚገኘውን የሸበሌይ ሪዞርት ግንባታ ስፍራ ጎብኝተዋል።

ከጅግጅጋ ከተማ 29 ኪሎ ሜትር ርቀት 385 ሄክታር በሚሸፍን ስፍራ ላይ የሚገነባው ኘሮጀክት የጅግጅጋ ከተማ እና አካባቢውን ወደ ግምባር ቀደም የቱሪዝም መዳረሻነት የሚለውጠው የቱሪዝም ስራ አምድ አካል ነው።

ይህ ስራ ኢትዮጵያ የያዘችውን የዘላቂ ቱሪዝም ስራ እና የኢኮኖሚ እድገት መንገድ አጉልቶ የሚያሳይ ነው።

የካቲት 5 ቀን 2016 ዓ.ም

ምክትል ጠቅላይ ሚኒስትር ተመስገን ጥሩነህ በባሕር ዳር ከተማ የተለያዩ የልማት ፕሮጀክቶችን ተዘዋውረው ተመለከቱ
*****
(ኢ.ፕ.ድ)

በምክትል ጠቅላይ ሚኒስትር ተመስገን ጥሩነህ የተመራ የፌዴራል መንግሥት ልዑክ ከትናንት ጀምሮ በክልሉ የልማት ሥራዎች ዙሪያ ከክልሉ መንግሥት አመራሮች ጋር እየመከሩ ነው።

ከዛሬ ጠዋት ጀምሮ ደግሞ ምክትል ጠቅላይ ሚኒስትር ተመስገን ጥሩነህ፣ ርእሰ መሥተዳድር አረጋ ከበደ እንዲሁም የፌዴራል እና የክልል ከፍተኛ የመንግሥት የሥራ ኀላፊዎች በባሕር ዳር ከተማ የሚገነቡ የተለያዩ የልማት ፕሮጀክቶችን ተዘዋውረው ጎብኝተዋል።

እንደ አሚኮ ዘገባ፤ የአዲሱን የዓባይ ድልድይ የግንባታ ሂደት የተመለከቱት ምክትል ጠቅላይ ሚኒስትሩ እና ልዑካቸው ብሔራዊ ባንክ እያስገነባው ያለውን ሕንጻም በቦታው ተገኝተው አስጀምረዋል።

በመጨረሻም ምክትል ጠቅላይ ሚኒስትር ተመስገን ጥሩነህ፣ ርእሰ መሥተዳድር አረጋ ከበደ እና ከፍተኛ የመንግሥት የሥራ ኀላፊዎች የባሕር ዳር ዓለም አቀፍ ስታዲየም ግንባታን ተመልክተዋል።

የካቲት 5 ቀን 2016 ዓ.ም

የቀዳማዊት እመቤት ጽ/ቤት በ100 ሚሊየን ብር በጅግጅጋ ያስገነባው የዱቄት እና ዳቦ ፋብሪካ ተመረቀ
*****
(ኢ.ፕ.ድ)

የቀዳማዊት እመቤት ጽሕፈት ቤት በ100 ሚሊየን ብር ወጪ በጅግጅጋ ከተማ ያስገነባው የዱቄት እና ዳቦ ፋብሪካ በዛሬው ዕለት ተመርቆ ለአገልግሎት በቅቷል፡፡

ጠቅላይ ሚኒስትር ዐቢይ አሕመድ (ዶ/ር) ፣ ቀዳማዊት እመቤት ዝናሽ ታያቸው፣ የሶማሊ ክልል ርዕሰ መሥተዳድር ሙስጠፋ መሐመድ፣ የፌዴራልና የክልል ከፍተኛ የሥራ ኃላፊዎችን ጨምሮ የጅግጅጋ ከተማ ነዋሪዎች በተገኙበት የዳቦ ፋብሪካዉ በሶማሊ ክልል ርዕሰ መስተዳደር አቶ ሙስጠፋ ሙሁመድና በቀዳሚ እመቤት ዝናሽ ታያቸዉ ተመርቆ ለአገልግሎት በቅቷል።

ፋብሪካው በቀን 300 ሺህ ዳቦና 420 ኩንታል ዱቄት የማምረት አቅም እንዳለው ተገልጿል፡፡

ዛሬ በጅግጅጋ የተመረቀው ፋብሪካ ስምንተኛው ሲሆን÷ በአዲስ አበባ ከተመረቀው ውጭ ሁሉም ተመሳሳይ የማምረት አቅም እንዳላቸውም ተጠቅሷል፡፡

በጽሕፈት ቤቱ አማካኝነት የሚገነቡት የዱቄትና የዳቦ ፋብሪካዎች በሚድሮክ ኢንቨስትመንት ግሩፕ የገንዘብ ድጋፍ የሚከናወኑ ናቸው ተብሏል፡፡

ተጨማሪ ፋብሪካዎች በደሴ፣ ነቀምቴ፣ አሶሳና ሠመራ ከተሞች በግንባት ላይ መሆናቸው የተገለጸ ሲሆን÷ የደሴው በቅርቡ ተጠናቆ ለአገልግሎት ክፍት እንደሚሆን ተጠቁሟል፡፡

የቀዳማዊት እመቤት ጽሕፈት ቤት በተለያዩ ከተሞች 12 የዱቄት እና ዳቦ ፋብሪካዎችን ለመገንባት እየሠራ ሲሆን በጅግጅጋ የተገነባውን ጨምሮ ስምንት ፋብሪካዎችን ወደ አገልግሎት መግባታቸውን ከክልሉ መገናኛ ብዙኃን ኤጀንሲ ያገኘነው መረጃ ያሳያል።

የካቲት 5 ቀን 2016 ዓ.ም

ጠቅላይ ሚኒስትር ዐቢይ አሕመድ የጅግጅጋ ከተማ የንፁህ መጠጥ ዉሀ ፕሮጀክትን ጎበኙ
**************
(ኢ.ፕ.ድ)
ጠቅላይ ሚኒስትር ዶ/ር ዐቢይ አህመድ በዛሬዉ እለት በሶማሊ ክልል 2ኛዉን ዙር የጅግጅጋ ከተማ የንፁህ መጠጥ ዉሀ ፕሮጀክትን ጎብኝተዋል።

ጠቅላይ ሚኒስትሩ ከሶማሊ ክልል ርዕሰ መስተዳደር አቶ ሙስጠፋ ሙሁመድ እና ከሌሎች የፌደራልና የክልል ከፍተኛ አመራሮች ጋር በመሆን በዛሬዉ እለት 2ኛዉን ዙር የጅግጅጋ ከተማ የንፁህ መጠጥ ዉሀ ፕሮጀክት የስራ እንቅስቃሴን መመልከታቸውን ከክልሉ መገናኛ ብዙኃን ያገኘነው መረጃ ያሳያል።

የካቲት 5 ቀን 2016 ዓ.ም