ምክር ቤቱ እንደ ዓባይ ሁሉ ለሀገራዊ አጀንዳዎች ድጋፉን አጠናክሮ እንደሚቀጥል አስታወቀ
***************
(ኢ ፕ ድ)
እንደ ዓባይ ፕሮጀክት ሁሉ ለትላልቅ ሀገራዊ አጀንዳዎች ድጋፉን አጠናክሮ እንደሚቀጥል የኢትዮጵያ ፖለቲካ ፓርቲዎች የጋራ ምክር ቤት አስታወቀ።

የጋራ ምክር ቤቱ ሰብሳቢ አቶ ደስታ ዲንቃ ለኢትዮጵያ ፕሬስ ድርጅት እንደገለጹት፤ የዓባይ ግድብ ሁሉም ኢትዮጵያዊያን የተሳተፉበት የጋራ ፕሮጀክት ነው። ግድቡ ኢኮኖሚያዊ ጉዳዮችን ጨምሮ ብዙ ችግሮችን ሊቀርፍ የሚችል በመሆኑ እስከዛሬ ድረስ ሁሉም ዜጎች በመረባረብ አሻራቸውን እያሳረፉበት ይገኛሉ ብለዋል።

የጋራ ምክር ቤቱም ከግድቡ ግንባታ ጀምሮ ድጋፍ ሲያደርግ መቆየቱን አስታውሰው፤ እንደ ዓባይ ያሉ ዘመን ተሻጋሪ የልማት ሥራዎች ላይ የሚደረገው ድጋፍ ተጠናክሮ ይቀጥላል ሲሉ ተናግረዋል።

ግድቡ በሀገር አቀፍ ደረጃ የሚታይ የልማት ጉዳይ በመሆኑ፤ ከፖለቲካ ውጪ በሆነ እይታ ውስጥ ያለና የሀገር ሀብት ነው ብለዋል።

የጋራ ምክር ቤቱ ከተቋቋመበት ጊዜ ጀምሮ የግድቡን ግንባታ እየደገፈ ያለውም የጋራ ሀብታችን መሆኑን.....

ሙሉውን ለማንበብ ሊንኩን ይጫኑ https://press.et/?p=124946

በከፍተኛ ትምህርት ተቋማት የአፈፃፀም ተጠያቂነት ስርዓት ሊተገበር ነው- ትምህርት ሚኒስቴር
*****
(ኢ ፕ ድ)
ከቀጣይ አመት ጀምሮ በከፍተኛ ትምህርት ተቋማት ጥራትን ለማምጣት የሚያግዝ የአፈፃፀም ተጠያቂነት ስርዓት ተግባራዊ ሊደረግ መሆኑን ትምህርት ሚኒስቴር አስታወቀ።

በትምህርት ሚኒስቴር የአስተዳደርና መሰረተልማት መሪ ስራ አስፈፃሚ ዶክተር ሰለሞን አብርሃ ለኢዜአ እንዳሉት፤ ከዚህ ቀደም የከፍተኛ ትምህርት ተቋማት ቁጥርን ለማሳደግ ሲሰራ ቢቆይም የትምህርት ጥራት ላይ ብዙ ይቀር እንደነበር አስታውሰዋል።

የትምህርትና ስልጠና ፍኖተ ካርታ ባሰፈረው ምክረሃሳብ፤ የትምህርት ጥራትና አግባብነት ላይ ያሉ ችግሮችን ለመፍታት የተለያዩ የሪፎርም ስራዎች ሲከናወን መቆየቱን ተናግረዋል።

የከፍተኛ ትምህርት ተቋማት ውጤታማ አለመሆን ከዚህ ቀደም ከሚታዩ ችግሮች መካከል መሆናቸውን አንስተው፤ ተቋማቱን ብቁና ውጤታማ ለማድረግ ዩኒቨርሲቲዎችን ራስ ገዝ የማድረግ ሂደት መጀመሩን ጠቅሰዋል።

የስርዓተ ትምህርት፣ የትምህርት ምዘና ማሻሻያ እንዲሁም ዩኒቨርሲቲዎችን በትኩረትና በተልዕኮ መስክ የመለየት ስራ ከማሻሻያው መካከል የሚገኙ እንደሆኑም ገልፀዋል።

ከዚህ ቀደም ተቋማት በፋይናንስ አጠቃቀማቸው እንጂ በአፈፃፀም ተጠያቂ የሚሆኑበት ስርዓት እንዳልነበር አንስተው ከሚቀጥለው አመት ጀምሮ ተቋማት በአፈፃፀማቸው ተጠያቂ የሚሆኑበትን አሰራር መተግበር ይጀመራል ብለዋል።

በተጠያቂነት የአሰራር ስርዓት መሰረት የከፍተኛ ትምህርት ተቋማት ከትምህርት ሚኒስቴር ጋር በቁልፍ ውጤት አመላካቾች ላይ ውል በማድረግ ስራቸውን እንደሚያከናውኑ ገልፀዋል።

ይህም በከፍተኛ ትምህርት ተቋማት የትምህርት ጥራትና አግባብነት ለማረጋገጥ እየተሰራ ያለውን ስራ የሚያግዝ መሆኑን ነው የተናገሩት።

የአፈፃፀም ተጠያቂነት ስርዓቱ ከፍተኛ ትምህርት ተቋማቱ ተመዝነው የተሻለ አፈጻጻም ያስመዘገቡት እውቅና እንዲያገኙ እንዲሁም ዝቅተኛ አፈፃፀም ያላቸው ደግሞ የማስተካከያ እርምጃዎች የሚወስዱበት አግባብ የሚፈጠርበት መሆኑንም ነው ያስረዱት።

ሚኒስቴሩ በቀጣይም የትምህርት ጥራትና አግባብነትን ለማረጋገጥ በዘርፉ ያለውን ስብራት ማከም የሚችሉ የተለያዩ አሰራሮችን በጥናት እየለየ እንደሚተገብርም ተናግረዋል።

መጋቢት 25 ቀን 2016 ዓ.ም