የአማራ ክልል የ2016 የክረምት በጎ ፍቃድ አገልግሎት መርሀ ግብር በባህርዳር ከተማ ተጀመረ
*********************
(ኢ ፕ ድ)

የአማራ ክልል የ2016 የክረምት በጎ ፍቃድ አገልግሎት መርሐግብር የክልሉ ርዕሰ መስተዳድር አቶ አረጋ ከበደ በባህርዳር ከተማ አስጀምረዋል።

በመርሃ ግብሩ ማስጀመሪያ ላይ የክልሉ ርዕሰ መስተዳድር አቶ አረጋ ከበደ፣ የብልጽግና ፓርቲ የአማራ ክልል ጽህፈት ቤት ሀላፊ አቶ ይርጋ ሲሳይ፣ የባህር ዳር ከተማ ተቀዳሚ ምክትል ከንቲባ አቶ ጎሹ እንዳላማውን ጨምሮ ሌሎች የክልልና የከተማ አስተዳደሩ ከፍተኛ ሥራ ሀላፊዎች ተገኝተዋል።

ርዕሰ መስተዳድሩ አቶ አረጋ ከበደ በማስጀመሪያ ስነ-ስርአቱ ላይ እንደገለጹት የበጎ ፍቃድ አገልግሎቱ ውጤታማ እንዲሆን ሁሉም የህብረተሰብ ክፍል የበኩሉን መወጣት አለበት።

ዛሬ በባህር ዳር ከተማ የተጀመረው የአቅመ ደካማ ቤቶችን የማደስና የመጠገን ተግባር ሌሎች የልማት ተግባራትን አካቶ በሁሉም የክልሉ አካባቢዎች ተጠናክሮ እንደሚቀጥል ተናግረዋል።

ያለው ለሌለው በማካፈል እርስ በርስ መረዳዳት ተጠናክሮ መቀጠል አለበት ያሉት አቶ አረጋ፣ ለክረምት በጎ ፍቃድ አገልግሎት ተግባር ስኬታማነት የሁሉም አስተዋጾ ወሳኝ መሆኑን አስገንዝበዋል።

በመሆኑም ባለሃብቱ በገንዘቡ፣ ባለሙያው በእውቀቱ፣ ወጣቱ በጉልበቱ እንዲሁም የሃይማኖት አባቶችና የአገር ሽማግሌዎች ህዝቡን የማስተባበር የበኩላቸውን እንዲወጡ አሳስበዋል።

በክረምት በጎ ፍቃድ አገልግሎት የአቅመ ደካሞችን መኖሪያ ቤት ከማደስ፣ ከመጠገንና በአዲስ መልክ ከመስራት ባለፈ የተለያዩ የልማት ተግባራት ይከናወናሉ ሲሉም ገልጸዋል።

በዋናነት የአካባቢ ጽዳት፣ የአረንጓዴ አሻራ የችግኝ ተከላ መርሃ ግብር፣ የወባ መከላከል እና ሌሎች ኢኮኖሚያዊ ፋይዳ ያላቸው የልማት ሥራዎች በትኩረት እንደሚሰሩ አመልክተዋል ሲል ኢዜአ ዘግቧል።
ሰኔ 6 ቀን 2016 ዓም

ግብርና ሚኒስቴር ለአየር ላይ አስሳና ጸረ ለተባይ ኬሚካል ለመርጨት የሚያስችሉ አውሮፕላንኖችን ገዛ
*****************
(ኢ ፕ ድ)

የግብርና ሚኒስቴር የአንበጣ መንጋና የግሪሳ ወፍ በሰብል ምርት ላይ የሚያደረሱትን ጉዳት ለመከላከል፣ ለአየር ላይ አስሳና ጸረ ተባይ ኬሚካል ለመርጨት የሚያስችሉ አምሰት አውሮፕላንኖችን መግዛቱን አስታወቀ።

በሚኒስቴሩ የእጽዋት ጥበቃ መሪ ስራ አስፈጻሚ አቶ በላይነህ ንጉሴ እንደገለጹት፣ ሚኒስቴር መስሪያ ቤቱ የገዛቸው ኤርትራክተር 802 በመባል የሚታወቁ ዘመናዊ አውሮፕላኖች የበረሃ አንበጣና የግሪሳ ወፍን መከላከል ያስችላሉ።

ለአውሮፕላንኖቹ ግዢ 10 ሚሊየን ዶላር ወጪ እንደተደረገባቸው ተናግረዋል፡፡
ባለፉት ጊዜያት በቂ የርጭት አውሮፕላንኖች ባለመኖራቸው የአንበጣ መንጋና የግሪሳ ወፍን መከላከል አዳጋች እንደነበር ጠቅሰው፣ በምርት ላይ ከፍተኛ ጉዳት ማድረሱን ተናግረዋል፡፡

የተገዙት አውሮፕላንኖች የምርት ብክነትን በመቀነስ ምርትና ምርታማነትንና የምግብ ዋስትናን ለማረጋገጥ ለሚደረገው እንቅስቃሴ ጠቀሜታቸው የጎላ ነው፡፡ አውሮፕላን የማስተዳደሩ ተግባር በብሔራዊ አየር መንገድ ኃ/የተ/የግል ማህበር የሚመራ መሆኑን ተናግረዋል፡፡

በተጨማሪም አውሮፕላንኖቹ ከላቸው አቅም የተነሳ ፀረ- አረም ና ፀረ-ተባይ የመርጨትና የሰደድ እሳት የመከላከልና የመቆጣጠር ተግባር ላይ እንደሚሰማሩም ገልጸዋል፡፡

የብሔራዊ አየር መንገድ ኃ/የተ/የግል ማህበር ስራ አስኪያጅ ካፒቴን አበራ ለሚ በበኩላቸው፤ በግብርና ሚኒስቴር የተገዙት አውሮፕላንኖች በግብርናው ዘርፍ የሚያጋጥሙ ችግሮችን ለመቅረፍ እንደሚያግዝ ገልጸው ማህበሩ የአየር ትራንስፖርት አገልግሎት ለመስጠት የሚያስችለውን የአየር ኦፕሬተር ፈቃድ ከኢትዮጵያ ሲቪል አቪዬሽን ባለሥልጣን አግኝቶ በሥራ ላይ ተሰማርቶ የሚገኝ መሆኑን ጠቁመዋል፡፡

አውሮፕላኖቹን የማስተዳደር፣ የሚያበሩ ባለሞያዎችንና ቴክኒሻኖችን እንዲሁም አስፈላጊውን የሰው ሀይል የማሟላት ስራን እንደሚሰራ ካፒቴን አበራ ገልጸዋል፡፡
በአማን ረሺድ
ሰኔ 6 ቀን 2016 ዓም

ባለፉት አስር ወራት ከ3 ሚሊዮን በላይ ለሚሆኑ ዜጎች በሀገር ውስጥና በውጭ የሥራ ዕድል ተፈጥሯል - ሙፈሪያት ካሚል
*********************
(ኢ ፕ ድ)

በ2016 በጀት ዓመት ያለፉት አስር ወራት ከ3 ሚሊዮን በላይ ለሚሆኑ ዜጎች በሀገር ውስጥና በውጭ የሥራ ዕድል መፈጠሩን የሥራና ክህሎት ሚኒስትር ሙፈሪያት ካሚል ተናገሩ።

ሚኒስትሯ እንደተናገሩት፤ በሀገር ውስጥ እና በውጭ ሀገር ለሥራ የሚሰማሩ ዜጎች ተፈላጊውን ክህሎት እንዲጨብጡ የማብቃት ተግባር ትኩረት ተሰጥቶታል።

በተለይም የሰለጠነ የሰው ኃይል ወደ ውጭ ለማሰማራት አስፈላጊው ዝግጅት ሲደረግ መቆየቱን አስታውሰው፥ ስልጠና ከመስጠት ባለፈ ብቁ ስለመሆናቸው የምስክር ወረቀት እንዲያገኙ እየተደረገ ነው ብለዋል።

እንደ ሚኒስትሯ ገለጻ በበጀት ዓመቱ አስር ወራት 314 ሺህ ዜጎች የውጭ ሀገር የሥራ ስምሪት ተጠቃሚ ሆነዋል።

የሥራ ስምሪቱ ዜጎች ደህንነታቸው፣ የሚያገኙት ጥቅምና መብታቸው ተጠብቆ እንዲሰሩ በሚያስችል መልኩ መከናወኑንም አብራርተዋል።

በሀገር ውስጥ የሥራ ዕድል ፈጠራ ከ2 ነጥብ 7 ሚሊዮን በላይ ዜጎች የስራ ዕድል ተጠቃሚ መሆናቸውን ጠቅሰው በጥቅሉ ለ3 ሚሊዮን 77 ሺህ ዜጎች የሀገር ውስጥና የውጭ የሥራ ዕድል መፈጠሩን ተናግረዋል።

ሚኒስትሯ እንዳሉት የዲጂታል ሥርዓት በመዘርጋት ዜጎች ተመዝግበው ወደ ሥራ ገበያው እንዲገቡ ለማድረግ ምቹ ሁኔታዎችን መፍጠር ላይም በትኩረት እየተሰራ ነው።

በቴክኒክና ሙያ ዘርፍም ወጣቶች ያላቸውን የፈጠራ ሀሳብ ወደ ቴክኖሎጂ ምርት መቀየር የሚችሉበት ስልጠና እና ምቹ ምህዳር መፈጠሩንም አክለዋል።

በዚህም የስራ ሀሳብ ያላቸው ወጣቶችን በማወዳደር ምርቶቻቸውን ለሀገር ኢኮኖሚ ዕድገት እንዲጠቀሙ በተጀመረው ሂደት 76 ቴክኖሎጂዎች ወደ ምርት መሸጋገራቸውን አብራርተዋል።

ስታርትአፖችና ኢንተርፕራይዞችን በማጎልበት ተጨማሪ የስራ ዕድል እንዲፈጥሩ በመንግስት ትኩረት መደረጉን አስረድተዋል።
ሰኔ 6 ቀን 2016 ዓም

የኢትዮጵያ አቪዬሽን ዘርፍ የደህንነት ስጋት እንደሌለበት በኦዲት ተረጋግጧል
*****************
(ኢ ፕ ድ)

የሲቪል አቪዬሽን ደኅንነት ዋና መምሪያ ዳይሬክተር አቶ አስራት ቀጄላ በሰጡት መግለጫ እንደገለጹት፣ ዓለም አቀፉ የሲቪል አቪዬሽን ድርጅት የኢትዮጵያ የአቪዬሽን ዘርፍ ከ12 አመት በኋላ የመጀመሪያውን የአቪዬሽን ደህንነት ማረጋገጫ ኦዲት ሰርቷል።

በዚህም መሰረት የኢትዮጵያ ውስጥ ያሉት አየር ማረፊያዎች ምንም አይነት የደህንነት ችግር እንደሌለባቸው አረጋግጧል።

እንደ ዳይሬክተሩ ገለጻ፣ መንግስት ለዘርፉ ልዩ ትኩረት ሰጥቶ ሲሰራ መቆየቱን ያመለክታል። በዚህም መሰረት በኢትዮጵያ የሚገኙ ኤርፖርቶች በተደረገላቸው ዳሰሳ ጥሩ ውጤት አግኝተዋል።

ኢትዮጵያ ሙሉ ለሙሉ ምንም አይነት የአቪዬሽን ስጋት የለባትም ያሉት ዳይሬክተሩ፣ ይህም ለኢትዮጵያና ለኢትዮጵያ አየር መንገድ ትልቅ ውጤት ነው። አየር መንገዱም የኢትዮጵያና የአፍሪካ ኩራት ሆኖ እንዲቀጥል ይረዳዋል ብለዋል።

ውጤቱ አየር መንገዱ በቀላሉና ያለ ምንም የቅድመ ደህንነት ፍተሻ የበረራ አድማሱን ለማስፋት ይረዳዋል። ሌሎች አየር መንገዶች ወደ ኢትዮጵያ መጥተው ለመስራት ትልቅ እድል ይከፍታ።

በኦዲት የተገኘው የአቪዬሽን ደህንነት ውጤት የቱሪዝም ፍሰቱን ያሳድገዋል። የኢትዮጵያን ገጽታም ለመገንባት ይረዳል።

የተሰጡ አስተያየቶች በቀላሉ የሚስተካከሉ ናቸው ያሉት ዳይሬክተሩ፣ የተጀመሩ ስራዎችን በማጠናከር በቅርቡ ማስተካከያ ይደረግባቸዋል ብለዋል።

በቀጣይም የአቪዬሽን ዘርፉን ተመራጭ ለማድረግ ስራዎች ተጠናክረው እንደሚቀጥሉ ገልጸዋል።
ሞገስ ጸጋዬ
ሰኔ 6 ቀን 2016 ዓም

በዘንድሮው የአረንጓዴ አሻራ ችግኝ ተከላ ፕሮግራም ከ7 ቢሊዩን በላይ ችግኞችን ለመትከል ዝግጅት ተደርጓል
********************
(ኢ ፕ ድ)

በዘንድሮው አመት የአረንጓዴ አሻራ ችግኝ ተከላ ፕሮግራም 7 ነጥብ 5 ቢሊዩን ችግኞችን ለመትከል ዝግጅት መደረጉን የግብርና ሚኒስቴር ሚኒስትር ግርማ አመንቴ (ዶ/ር) ተናግረዋል፡፡

በዘንድሮው አመት በአንድ ጀምበር በሚደረገው ችግኝ ተከላ መርሐግብርን በዓለም ድንቃድንቅ መዝገብ ላይ ለማስፈር ዝግጀት እየተደረገ መሆኑም ተገልጿል።

ከሚተከሉ ችግኞች 43.9 በመቶ የደንና የውበት እንዲሁም 56.1 በመቶ የጥምር ደን መሆኑን ሚኒስትሩ ገልፀዋል፡፡

ከ800 ሺህ ሄክታር መሬት በላይ ችግኝ የሚተከልባቸው ቦታዎችን በጂኦሪፈራንስ እንዲለዩና ካርታ እንዲወጣላቸው ማድረግ እንደተቻለ አብራርተዋል፡፡

በዘንድሮው አመት በአንድ ጀምበር በሚደረገው ችግኝ ተከላ መርሐግብር በርካታ ችግኞችን በመትከል በዓለም ድንቃድንቅ መዝገብ ላይ ለማስፈር ዝግጀት እየተደረገ መሆኑን ከግብርና ሚኒስቴር ያገኘነው መረጃ ያመለክታል።

የተፈጥሮ ሃብት መመናመንና የአየር ንብረት ለውጥ የሚያስከትለውን አሉታዊ ተፅዕኖ በመከላከል የግብርናውን ምርትና ምርታማነት ለማሳደግና ዘላቂነት ያለው አረንጓዴ ኢኮኖሚ ለመገንባት የአረንጓዴ አሻራ ትልቅ ድርሻ አለው፡፡

በአንደኛው ምዕራፍ የአረንጓዴ አሻራ መርሀ-ግብር በአጠቃላይ 20 ቢሊዮን ችግኞችን ለመትከል ታቅዶ መላውን ህብረተሰብ በተደራጀ ሁኔታ በማነቃነቅ 25 ቢሊዮን ችግኞችን መትከል ተችሏል።

ሰኔ 6 ቀን 2016 ዓ.ም

የሀረር ኢኮ ፓርክ ግንባታ ስራ 92 በመቶ ተጠናቋል- አቶ ተወለዳ አብዶሽ ባህል ፣ቅርስና ቱሪዝም ቢሮ ኃላፊ
*****
(ኢ ፕ ድ)

በሀረር ከተማ ከመደመር ትውልድ መፅሃፍ ሽያጭ በተገኘ ገቢ እየተገነባ የሚገኘው የሀረር ኢኮ ፓርክ ግንባታ 92 በመቶ መጠናቀቁን የሀረሪ ክልል ባህል ፣ቅርስና ቱሪዝም ቢሮ ኃላፊ አቶ ተወለዳ አብዶሽ ገለፁ፡፡

ፓርኩ በውስጡ ሀረር የምትታወቅበትን የጅብ ትርኢት ማሳያ አንፊ ቲያትር ጨምሮ የተለያዩ ባህላዊ የእደ ጥበብ ውጤቶች ለቱሪስቶች የሚሸጡበት ማእከላትና የመዝናኛ ስፍራዎችን በውስጡ የያዘ መሆኑን ገልፀዋል፡፡

ፓርኩ እየተገነባበት የሚገኘው ስፍራ ሀረር የምትታወቅባቸው የተለያዩ እፅዋት የነበሩበት ስፍራ መሆኑን ጠቅሰው፣በስፍራው ይገኙ የነበሩ አትክልትና ቡናን ጨምሮ የተለያዩ መድሃኒትነት ያላቸው እፅዋቶችን መልሶ በማልማት ተጨማሪ የቱሪዝም መዳረሻ ለመፍጠር እየተሰራ እንደሚገኝም ገልፀዋል፡፡

ፕሮጀክቱ ከመደመር ትውልድ መፅሃፍ ሽያጭ በተገኘ ከ70 ሚሊየን ብር በላይ ገቢና በክልሉ የሚገኙ ባለሃብቶች፣ የንግዱ ማህበረሰብ የመንግስት ሰራተኞችና የተለያዩ የማህበረሰብ ክፍሎች ተሳትፎ እየተገነባ እንደሚገኝ ገልፀዋል፡፡

ፓርኩን ለመገንባት ከሚያስፈልገው 162 ሚሊየን ብር ከ50 በመቶ በላይ የሚሆነው የተለያዩ የማህበረሰብ ክፍሎች የተሸፈነ መሆኑ ፕሮጀክቱን በክልሉ በመንግስት እየተገነቡ ከሚገኙ ሌሎች ፕሮጀክቶች የተለየ ያደርገዋል ብለዋል፡፡

የፓርኩ ግንባታ ሲጠናቀቅም ለአካባቢው ማህበረሰብ የስራ እድል ከመፍጠር ባሻገር ለክልሉ የቱሪዝም እድገት ትልቅ አስተዋጽኦ የሚያበረክት መሆኑን የክልሉ ኮሙኒኬሽን መረጃ ያመለክታል።

ሰኔ 6 ቀን 2016 ዓም