በወቅታዊ ሀገራዊ የደህንነትና ፀጥታ ጉዳዮች ዙሪያ በመምከር የብሔራዊ ደህንነት ምክር ቤት የሰጠው መግለጫ ዋና ዋና ነጥቦች‼️

👉 በለውጥ ጎዳና ላይ በመጓዝ ዴሞክራሲን የሚገነቡ ሀገራት በሁለት ጫፍ መካከል የሚቆም ፈተና ይገጥማቸዋል፤

👉 በአንዱ ዴሞክራሲያዊ ባህልን መገንባት ሲሆን ሌላ የሀገርንና የሕዝብን ሰላምና ደኅንነት በጥብቅ ርምጃዎች ማስከበር ነው፣

👉 ዴሞክራሲያዊ ባህልን ለመገንባት ስንነሣ የሕዝብን ሰላምና ደኅንነት የሚያስከብሩ ጥብቅ ዕርምጃዎች በነጻነትና በመብት ስም እንዳይላሉ በሚዛን መንቀሳቀስ ይገባል፣

👉 ሁለቱን በሚዛን ለማከናወን ደግሞ የእያንዳንዱ ዜጋ፣ ተቋም፣ ፓርቲ፣ ቡድን፣ ወገን፣ የሚጠበቅበትን ማድረግ አለበት፤ የህግና የጸጥታ ተቋማትም ሕገ መንግሥታዊና ታሪካዊ ኃላፊነታቸውን መወጣት አለባቸው፣

👉 ሕዝብን ከሕዝብ የሚያጋጩ ቡድኖችንና ግለሰቦችን፣ ሐሰተኛ መረጃዎችን በማሠራጨት ሕዝብና ሀገርን ሰላም የሚነሡ አካላትን፣ በሕገ ወጥ መንገድ ታጥቀው የሕዝብን ሰላም የሚነሡና በተላላኪነት የሚያገለግሉ ቡድኖችን በጥናትና በመረጃ በመለየት አስፈላጊው ሁሉ ሕግ የማስከበር ርምጃ እንዲወሰድ የደኅንነት ምክር ቤቱ ወስኗል፣

👉 የምግብና ልዩ ልዩ ሸቀጦች ዋጋ እንዲንር በሕገ ወጥመንገድ ምርት የሚያከማቹ፣ በኮንትሮባንድ መልክ ነዳጅና ሌሎች ምርቶችን ወደ ጎረቤት ሀገራት የሚያሾልኩ ሕገ ወጥ ነጋዴዎች ላይ ተገቢው እርምጃ ይወሰዳል፣

👉 ወላጆች ልጆቻችሁን፣ ሽማግሌዎች ወጣቶቻችሁን፣ የሃይማኖት አባቶች ምእመኖቻችሁን፣ የፓርቲ መሪዎች አባሎቻችሁን፣ የጎሳ መሪዎች ወገኖቻችሁን በመምከር ሁሉም ኢትዮጵያዊ ከግጭትና ከሽብር ራሱን አርቆ፣ ለሰላምና ለሀገር ደኅንነት የሚጠበቅበትን ሚና እንዲወጣ ተጠይቋል፣

ሠመራ ዩኒቨርሲቲ እና የቱርኩ ማዐሪፍ ፋውንዴሽን በጋራ ለመስራት ተስማሙ
**********************
(ኢ ፕ ድ)

ሠመራ ዩኒቨርሲቲ ከቱርክ ማዐሪፍ ፋውንዴሽን ጋር በጋራ በትምህርት፣ በምርምር፣ በባህልና በቋንቋ ጉዳዮች ላይ በጋራ ለመስራት የትብብር ስምምነት ተፈራረመ።

ስምምነቱን የሠመራ ዩኒቨርሲቲ ፕሬዚዳንት ዶክተር መሀመድ ኡስማን እና በኢትዮጵያ የቱርክ ማዐሪፍ ፋውንዴሽን ተወካይ ሌቬንት ሳሂን ፈርመዋል።

በስምምነቱ የሠመራ ዩኒቨርሲቲ መምህራን እና ሰራተኞች በቱርክ የድህረ ምረቃ ትምህርቶችን የመከታተል እድሉ ይኖራቸዋል ተብሏል።

ማዐሪፍ ፋውንዴሽን የተቋቋመው በሰው ልጆች የጋራ እውቀትና እሴቶች ላይ የተመሰረተ መደበኛና መደበኛ ያልሆኑ አገልግሎቶችን ለመስጠት መሆኑን ከዩኒቨርሲቲው ያገኘነው መረጃ ያመላክታል፡፡

በአቶ አህመድ ሽዴ የተመራው ልዑክ ከብሪታንያ የአፍሪካ ጉዳዮች ሚኒስትር ጋር ተወያዩ
********************
(ኢ ፕ ድ)

በገንዘብ ሚኒስትር አቶ አህመድ ሽዴ የተመራው ልዑክ በብሪታኒያ የውጭ ጉዳይ ሚኒስቴር የአፍሪካ ጉዳዮች ሚኒስትር ቪኪ ፎርድ ጋር የሁለትዮሽና የኢኮኖሚ ትብብር ማድረግ በሚያስችሉ ጉዳዮች ላይ ተወያየ።

በውይይቱም ለኢትዮጵያ እና እንግሊዝ ጠቃሚ በሆኑ የሁለትዮሽና የኢኮኖሚ ትብብር ጉዳዮች ላይ መክረዋል።

የሰብዓዊ አቅርቦት እና ድጋፍ ለሚያስፈልጋቸው ዜጎች ሁሉ መደረግ ስላለበት ድጋፍ መወያየታቸውም ተገልጸዋል።

በተመሳሳይ ሚኒስትሩ በኢትዮጵያ፣ ሱዳን፣ በደቡብ ሱዳንና በኤርትራ የዓለም ባንክ ዳይሬክተር ኦስማን ዲዮን ጋርም በተለያዩ ርዕሰ ጉዳዮች ላይ መክረዋል።

በባንኩ ፖርትፎሊዮ አፈጻጸም፣በአለም ባንክና በኢትዮጵያ መካከል ያለውን ትብብር ማጠናከር በሚቻልበት ሁኔታ ላይም ተወያይተዋል። ሚኒስትሩ በቅርቡ ዓለም ባንክ በግጭት ለተጎዱ ላደረገው ድጋፍ አመስግነዋል።

በኢትዮጵያ፣ ሱዳን፣ በደቡብ ሱዳንና በኤርትራ የዓለም ባንክ ዳይሬክተር ኦስማን ዲዮን፣ በበኩላቸው መንግስት ቅድሚያ ለሰጣቸው የልማት ፕሮጀክቶችለመደገፍ ያላቸውን ቁርጠኝነት አረጋግጠዋል።

በገንዘብ ሚኒስትሩ አቶ አሕመድ ሺዴ የተመራው ልዑክ በዓለም ባንክ እና ዓለም አቀፉ የገንዘብ ተቋም ዓመታዊ ስብሰባ ላይ ለመሳተፍ ዋሺንግተን ዲሲ መግባቱ ይታወሳል።