"ኅብር ህይወቴ" የተሰኘው የኤሜሪተስ ፕሮፌሰር ባሕሩ ዘውዴ ግለ ታሪክ መፅሐፍ ተመረቀ
*****************

ለረጅም ዓመታት በኢትዮጵያ ታሪክ ዙሪያ ምርምር እና ጥናት በማድረግ የሚታወቁት ኤሜሪተስ ፕሮፌሰር ባሕሩ ዘውዴ በራሳቸው የህይወት ታሪክ ዙሪያ የሚያጠነጥነው "ኅብር ሕይወቴ" ግለ ታሪክ መፅሃፍ በአዲስ አበባ ዩኒቨርሲቲ በዋናው ግቢ 6 ኪሎ ካምፓስ ራስ መኮንን አዳራሽ ተመርቋል።

መፅሃፉ በ3 ዋና ክፍሎች የተከፈለ ሲሆን የፕሮፌሰሩን የልጅነት፣ ወጣትነት እና ጉልምስና ዕድሜያቸውን ባሳለፉበት አካዳሚያዊ፣ ፖለቲካዊ እና ማህበራዊ የህይወት ዑደቶች ዙሪያ የሚያጠነጥን ነው፡፡

ፕሮፌሰር ባሕሩ ዘውዴ በርካታ ጥናታዊ ፅሁፎችን ጨምሮ በኢትዮጵያ ዘመናዊ ታሪክ ዙሪያ የሚያጠነጥኑ መፅሃፍቶችን ለንባብ ያበቁ ሲሆን ስለ ኢትዮጵያ ታሪክ በተለያዩ ሃገራት ዩኒቨርሲቲዎች ተጋባዥ መምህር በመሆን አስተምረዋል፡፡

"ኅብር ሕይወቴ ግለ ታሪክ" የተሰኝውን መጽሐፍ የኢትዮጵያ ጥናት ተቋም ወዳጆች ማሕበር፣ የኢትዮጵያ ጥናት ተቋም፣ የታሪክ ክፍለ ትምህርት፣ የአዲስ አበባ ዩንቨርሲቲ የውጭ ግንኙነት ክፍል በጋራ በመሆን ነው ያስመረቁት።

ተወዳጁ ሙዚቀኛ ብስራት ሱራፌል ''ማለፊያ'' የተሸኘ ሁለተኛ አልበሙን ለአድማጭ ሊያደርስ ነው
*********************

ተወዳጁ ሙዚቀኛ ብስራት ሱራፌል ''ማለፊያ'' የተሸኘ ሁለተኛ አልበሙን ለአድማጭ ሊያደርስ ነው።

በሀገሪቱ የሙዚቃ ኢንዱስትሪ ውስጥ በአጭር ጊዜ ተደማጭና ታዋቂ ለመሆን የቻለውና የበርካታ ግጥምና ዜማ ደራሲ የሆነው ድምፃዊ ብስራት ሱራፌል ሁለተኛ አልበሙን ከኤላ ቲቪ ጋር በመሆን የፊታችን ሀምሌ 14 ቀን 2015 ዓ.ም ለአድማጭ እንደሚያደርስ ዛሬ በሀገር ፍቅር ቴአትር አዳራሽ በተሰጠ ጋዜጣዊ መግለጫ አስታውቋል ።

ከዚህ ቀደም ቃል በቃል የተሰኘ የመጀመሪያ አልበሙንና የተለያዩ ነጠላ ዜማዎችን በመስራት በሙዚቃ አፍቃሪያን ዘንድ ተወዳጅና ታዋቂ ለመሆን የቻለው አርቲስት ብስራት ሱራፌል ''ማለፊያ'' የተሰኘው አዲሱ አልበም ለ 4 አመታት ያህል የተለፋበትና ከ20 በላይ በሙዚቃው ኢንዱስትሪ ስመ ጥር የሆኑ ባለሙያዎች በግጥም በዜማ እንዲሁም በቅንብር የተሳተፉበት መሆኑ ተገልጿል።
https://www.facebook.com/EBCmezenagna/posts/pfbid02ts9tHcaPAEZuuycwubxTDvjpUdukm5nkJfbM83PABM6WMpeEieXZT5AaaGU43nq3l

ወደ ጎረቤት ሀገር ሊሻገር የነበር አደንዛዥ እፅ፣ የዝሆን ጥርስ፣ ደረቅ ጫት እና ነዳጅ በቁጥጥር ስር ዋለ
**********************

በሁመራ ከተማ፣ ዲማ፣ ባዕከር እና ራዊያን ኬላ በተደረገ ፍተሻ ወደ ጎረቤት ሀገር ሱዳን ሊሻገር የነበረ አደንዛዥ ዕፅ፣ የዝሆን ጥርስ፣ ደረቅ ጫት፣ እና ነዳጅ በመከላከያ ሠራዊቱ በቁጥጥር ስር ዋለ።

እቃዎቹ በቁጥጥር ስር የዋሉት ሕብረተሰቡ ለህግ አካላት ባደረገው ጥቆማ በመነሻነት በተደረገ ክትትል መሆኑን ሌተናል ኮሎኔል ግርማ በድዬ ተናግረዋል።

ሠራዊቱ በኬላዎችም ይሁን በሌላ መንገድ የሚዘዋወሩ ህገ-ወጥ ዝውውሮችን በመቆጣጠር ሀገራዊ ግዴታውን እየተወጣ እንደሆነም ሌተናል ኮሎኔል ግርማ ገልጸዋል።
https://www.facebook.com/EBCzena/posts/pfbid0JLTdtK9S9XsAyt17BFY3Y9KZBe89AEscGoMLhkNTiKA3eYQsHUpinSkiaKNndTEPl

በተጠናቀቀው በጀት በአዲስ አበባ ከ416 ሺህ በላይ ዜጎች የስራ እድል ተፈጥሯል- ከንቲባ አዳነች አቤቤ
**********************************

በ2015 በጀት በመዲናዋ ከ416 ሺህ በላይ ዜጎች የስራ እድል መፈጠሩን የአዲስ አበባ ከተማ አስተዳደር ከንቲባ አዳነች አቤቤ ገለጹ።

ሶስተኛው የአዲስ አበባ ከተማ ምክር ቤት ሁለተኛ ዓመት የስራ ዘመን አራተኛ እና የበጀት ዓመቱ ማጠቃለያ መደበኛ ጉባኤ እያካሄደ ነው።

የአዲስ አበባ ከተማ አስተዳደር ከንቲባ አዳነች አበቤ ለከተማዋ ምክር ቤት የአስተዳደሩን የ2015 በጀት ዓመት አፈጻጸም ሪፖርት በማቅረብ ላይ ናቸው።
https://www.facebook.com/EBCzena/posts/pfbid0Md2pKCoFzcPqtxQvHoxvqR4EULq5besoEH7iskftJsZtqahz2eJHMV6oEDUQpj8jl

የኢትዮጵያ ኦርቶዶክስ ተዋሕዶ ቤተክርስቲያን የሰላም ልዑካን መቐሌ ገቡ
***********************************************

የኢትዮጵያ ኦርቶዶክስ ተዋሕዶ ቤተክርስቲያን የሰላም ልዑካን ትግራይ ክልል መዲና መቐሌ ገብተዋል።

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ፣ ብፁዓን አበው ሊቃነ ጳጳሳት ፣ የሀገር ሽማግሌዎች መቐሌ አሉላ አባ ነጋ ኤርፖርት ሲደርሱ የትግራይ ክልል ጊዜያዊ አስተዳደር ጽሕፈት ቤት ኃላፊ አቶ አማኑኤል አሰፋ አቀባበል አድርገውላቸዋል።

ብፁዕ ወቅዱስ አቡነ ማትያስ ፣ ብፁዓን አበው ሊቃነ ጳጳሳት እና የሰላም ልኡካኑ ከትግራይ ክልል ጊዜያዊ አስተዳደር ርዕሰ መስተዳድር ከአቶ ጌታቸው ረዳ ጋር በመቐሌ አሉላ አባ ነጋ ኤርፖርት ተገናኝተው መወያየታቸውን የኢኦተቤ መገናኛ ብዙኀን አገልግሎት ሥርጭት ድርጅት መረጃ ያመለክታል።