የኢትዮጵያ ህልም የነበረው ኅብረት ተሳክቷልን?
****************

ኢትዮጵያ ለአፍሪካ እና በቅኝ ግዛት ሥር ለነበሩት ሀገራት ነጻነት የከፈለችው ዋጋ ውድ ነው፡፡ ነጻነቷን ጠብቃ የኖረችው ኢትዮጵያ ብቻዋን የመንግሥታቱ ማኅበር አባል በነበረችበት ወቅት የአውሮፓውያንን የግፍ ወረራ አውግዛለች፤ ብቻዋንም በፍትህ አደባባይ ቆማለች፡፡

የኢትዮጵያ የፍትህ አደባባይ ጩኸት የገለጠው የአውሮፓውያን ግፍ አውዳሚው የሁለተኛ ዓለም ጦርነት እንዲከሰት አድርጓል፡፡ ይሁንና ከታሪክ ያልተማረው ዓለም አሁንም ኢትዮጵያ፣ የአፍሪካን እና የጭቁን ሕዝቦችን ጩኸት እየሰማ ባለመሆኑ ዓለም መከራ ውስጥ እንድትኖር አድርጓታል፡፡

ኢትዮጵያ የዓለም ኅብረቶችን መሥራች ሆና በአባልነት የምትቀላቀለው በዓለም ላይ ፍትህ እንዲሰፍን፣ ጉልበተኞች አቅመ ቢሶችን እንዳይጨፈልቁ እና ሁሉም የዓለም ሕዝብ በእኩልነት የመኖር መብቱ እንዲከበርለት ነው፡፡

ለዚህም ነው ራሷ ነጻነቷን ስላስከበረች በቃ ብላ ያልተቀመጠችው፡፡ አፍሪካውያን ወንድሞቿ ነጻ ሳይወጡ ነጻነቷ ሙሉ ስለማይሆን አፍሪካውያን ከቅኝ ግዛት ነጻ እንዲሆኑ የታገለችው፡፡ የዓለምን ፍትህ የማይሻው የምዕራባውያኑ ጎራ ይህን የኢትዮጵያን ጥረት ለማሰናከል እና አፍሪካን ድምጽ አልባ ለማድረግ ዛሬም ኢ-ፍትሃዊ ጫናውን እንደቀጠለ ነው፡፡

ኢትዮጵያ አፍሪካ ነጻነቷን እንድታገኝ ካደረገቻቸው ትግሎች ጎን ለጎን አፍሪካውያን ኅብረት ፈጥረው የሚደርስባቸውን ጫና እንዲቋቋሙ እና ሕዝቦቻቸው ወደ ተሻለ ህይወት እንዲሸጋገሩ ስትሰራ ቆይታለች፡፡
https://www.facebook.com/EBCzena/posts/pfbid0taa67HvPawF3sNSrRCjMEQVw2szFxEWgwjPzvxoA34xN6B3dwGcgNXeC3RyVzYPFl

የውጭ ጉዳይ ሚኒስትር አምባሳደር ታዬ አጽቀሥላሴ ከማዕከላዊ አፍሪካ ሪፐብሊክ እና ከፖርቱጋል የውጭ ጉዳይ ሚኒስትሮች ጋር ተወያዩ
*********************

የውጭ ጉዳይ ሚኒስትሩ አምባሳደር ታዬ አጽቀሥላሴ ከማዕከላዊ አፍሪካ ሪፐብሊክ የውጭ ጉዳይ ሚኒስትር ሲልቪ ባይፖ-ተሞን ጋር በሁለትዮሽ እና ቀጣናዊ ጉዳዮች ዙሪያ ተወያይተዋል።

በተመሳሳይ ሚኒስትሩ ከፖርቱጋል የውጭ ጉዳይ ሚኒስትር ጃኦ ጎሜዝ ክራቪኝዎ ጋር በሁለትዮሽ እና ዓለም አቀፋዊ ጉዳዮች ዙሪያ መክረዋል።

አምባሳደር ታዬ ኢትዮጵያ ከፖርቱጋል ጋር በቱሪዝም፣ በትምህርት፣ በንግድ እና በኢንቬስትመንት ዘርፎች ተባብራ መስራት ትፈልጋለች ብለዋል።

የፖርቱጋሉ ሚኒስትር በበኩላቸው አገራቸው የፕሪቶሪያ የሰላም ስምምነት ትግበራን እንደምትደግፍ መግለጻቸውን ከውጭ ጉዳይ ሚኒስቴር ያገኘነው መረጃ ያመለክታል።

የአፍሪካ አገራት የውጭ ጉዳይ ሚኒስትሮችን ጨምሮ የተለያዩ አገራት አምባሳደሮች የዓድዋ ድል መታሰቢያን ጎበኙ
*************************

በጉብኝት መርሐ ግብሩ ላይ የውጭ ጉዳይ ሚኒስትር አምባሳደር ታዬ አፅቀስላሴ፣ የውጭ ጉዳይ ሚኒስትር ዴኤታ አምባሳደር ብርቱካን አያኖ፣ የሀገራት የውጭ ጉዳይ ሚኒስትሮች እና የሃይማኖት ተቋማት መሪዎችን ጨምሮ ጥሪ የተደረገላቸው እንግዶች ተገኝተዋል።

በጉብኝቱ ላይ ለተገኙ ታዳሚዎች በዓድዋ ጦርነት የቀደሙ አባቶች ለነጻነት ስለከፈሉት መስዋዕትነት፣ የትግል ሂደት እንዲሁም ስለድል መታሰቢያው አጠቃላይ ይዘት ማብራሪያ መሰጠቱን ኢዜአ ዘግቧል።

በዚያው በዓድዋ ድል መታሰቢያ የውጭ ጉዳይ ሚኒስትር አምባሳደር ታዬ አፅቀስላሴ የ44ኛው የሕብረቱ የአስፈፃሚ ምክር ቤት ስብሰባ ተሳታፊ ለሆኑ የውጭ ጉዳይ ሚኒስትሮች እና ሌሎች እንግዶች የእራት ግብዣ ማድረጋቸውን ከውጭ ጉዳይ ሚኒስቴር ያገኘነው መረጃ ያመለክታል።

"የጎበኘናቸው የልማት ስራዎች ለህዝቡ ዕድገት ወሳኝ በመሆናቸው በቅርብ ተከታትለን ለፍፃሜ እናደርሳቸዋለን" - አቶ ተመስገን ጥሩነህ
**********

በአማራ ክልል ጉብኝት የተደረገባቸው የልማት ስራዎች ለህዝቡ ዕድገት ወሳኝ በመሆናቸው የቅርብ ክትትል በማድረግ ለፍፃሜ ለማድረስ አንደሚሰራ ምክትል ጠቅላይ ሚኒስትር አቶ ተመስገን ጥሩነህ ገለፁ፡፡

ምክትል ጠቅላይ ሚኒስትሩ በማህበራዊ ትስስር ገጻቸው ባሰፈሩት መልእክት፤ በአማራ ብሄራዊ ክልላዊ መንግስት ለተደረገላቸው ደማቅ አቀባበል ምስጋና አቅርበዋል።

በአማራ ክልል በነበራቸው ቆይታ ከጠቅላላ የክልሉ አመራር ጋር በፀጥታ እና በልማት ስራዎች ዙሪያ ያደረጓቸው ውይይቶች ማርሽ ቀያሪ እንደነበሩ ጠቅሰዋል።

"የጎበኘናቸው የልማት ስራዎችም ለክልሉ ህዝብ ዕድገት ወሳኝ በመሆናቸው በቅርብ ተከታትለን ለፍፃሜ እናደርሳቸዋለን" ሲሉም ገልጸዋል።

በአዳማ ከተማ ለሽብር ወንጀል ሊውል የነበረ በርካታ ሕገ-ወጥ የጦር መሳሪያ ተያዘ
**************

በአዳማ ከተማ ለሽብር ወንጀል ሊውል የነበረ በርካታ ሕገ-ወጥ የጦር መሳሪያ እና ጥይት በፍተሻና በሕዝብ ጥቆማ በቁጥጥር ስር ዋለ።

በአዳማ ከተማ ፖሊስ ከሌሎች የፀጥታ አካላት ጋር በመቀናጀት በከተማው በተለያዩ ጊዜያት የሽብር ተግባር ለመፈፀም መነሻቸውን አዋሽ ሰባት፣ ሰበታ እና ሌሎች አካባቢዎች በማድረግ በተሽከርካሪ ታግዘው ሕገ-ወጥ መሣሪያውን ወደ አዲስ አበባ ከተማ እና ወደ ሌሎች አካባቢዎች በማዘዋወር የሽብር ተግባር ለመፈፀም የሞከሩ አሸባሪዎችንና ተባባሪዎቻቸውን ከህብረተሰቡ በተገኘ ጥቆማ እና በተደረገ ጥብቅ ፍተሻ በቁጥጥር ስራ መዋል መቻሉ ተጠቅሷል፡፡

በዚህም 61 ቦንብ፣ 6 ሺህ የክላሽንኮቭ ጠመንጃ ጥይት፣ 4 ሺህ 983 የሽጉጥ ጥይት፣ 1 ሺህ 879 የብሬን ጥይት፣ 17 ክላሽንኮቭ ጠመንጃ፣ 18 የተለያየ አይነት ሽጉጥ፣ ዘጠኝ የብሬን ሸንሸን (ሰንሰለት)፣ አንድ ስናይፐር፣ አንድ ላውንቸር፣ ሁለት ቁንቡላ፣ አንድ የጦር ሜዳ መነጽር እና 242 ሺህ 220 ብር መያዙን የአዳማ ከተማ ፖሊስ ገልጿል።

ህገ-ወጥ የጦር መሣሪያዎችንና ጥይቶችን ለሽብር ቡድኑ ሊያስተላልፉ የነበሩ ተጠርጣሪዎች እና የመኪናው ሾፌርም ከነ-ኤግዚብቱ በቁጥጥር ሥር ውለው ምርመራ እየተጣራባቸው እንደሚገኝ የአዳማ ፖሊስ ዋና መምሪያ ጠቁሟል።
https://www.facebook.com/EBCzena/posts/pfbid02E48btinTYvnD7w27AFXY2qWzLECSxVXdHU4TykT5YxuAuSCgfJJ4HesMdwsyhtKul