44ኛው የአፍሪካ ህብረት የስራ አስፈጻሚዎች ምክር ቤት መደበኛ ስብሰባ ተጀመረ

📌 አማርኛ የህብረቱ የስራ ቋንቋ እንዲሆን ጥያቄ ቀርቧል

****
(ኢ.ፕ.ድ)

44ኛው የአፍሪካ ሕብረት የስራ አስፈጻሚዎች ምክር ቤት መደበኛ ስብስባ ዛሬ በአዲስ አበባ መካሄድ ጀምሯል።

በስብስባው ላይ የአፍሪካ ህብረት ኮሚሽን ሊቀመንበር ሙሳፋኪ መሃመት፣ የኢፌዴሪ የውጭ ጉዳይ ሚኒስትር አምባሳደር ታዬ አፅቀ ስላሴ፣ የሕብረቱ አባል አገራት የውጭ ጉዳይ ሚኒስትሮች እና ዲፕሎማቶች፣ የሕብረቱ ከፍተኛ አመራሮች፣ ቀጣናዊ የአፍሪካ ተቋማት ኃላፊዎች እና የዓለም አቀፍ ተቋማት ተወካዮች ተገኝተዋል።

የኢፌዴሪ የውጭ ጉዳይ ሚኒስትር አምባሳደር ታዬ አፅቀ ስላሴ ባደረጉት ንግግር፤ የኢትዮጵያ መንግስት ለአፍሪካውያን ችግሮች አፍሪካዊ መፈትሔ በሚለው እሳቤ እየሰራበት ነው። በዚህም በሰሜኑ የሀገሪቱ ክፍል የተከሰተውን ችግር ተከትሎ የተደረሰውን የፕሪቶሪያ
የሰላም ስምምነት ተግባራዊ እያደረገ ነው ብለዋል።

እንዲሁም ሀገራዊ የምክክር ኮምሽን ተቋቋሞ የሚከሰቱ ችገሮችን በዘላቂነት ለመፍታት እየተሰራ መሆኑን አንስተው፤ አማርኛ ቋንቋ የህብረቱ የስራ ቋንቋ እንዲሆን ጥያቄ አቅርበዋል።

ምክር ቤቱ በስብሰባው በአፍሪካ የልማት አጀንዳዎች ላይ ስትራቴጂካዊ ውሳኔዎችን ያሳልፋል ተብሎ የሚጠበቅ ሲሆን ኢንዲሁም በንግድ፣ በትምህርት፣ በወጣቶችና ሴቶች፣ በግብርና፣ በአየር ንብረት ለውጥ፣ በሰላምና ፀጥታ እንዲሁም በሌሎች የአህፍሪካን የ2063 አጀንዳ ዕውን ለማድረግ በሚያስችሉ ጉዳዮች በጥልቀት ይመክራል ተብሎ ይጠበቃል።

ስብሰባው ዛሬና ነገ የሚካሄድ ሲሆን 37ኛው የህብረቱ የመሪዎች ጉባዔ ደግሞ የካቲት 9 እና 10 ቀን 2016 ዓ.ም የሚካሄድ ይሆናል።

በቃልኪዳን አሳዬ

ፊልድ ማርሻል ብርሃኑ ጁላ ከጣሊያን ጠቅላይ ኢታማዦር ሹም ጋር ተወያዩ
***
(ኢ.ፕ.ድ)

የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ ከጣሊያን ጠቅላይ ኢታማዦር ሹም አድሚራል ጁሴፔ ቻቮ ጋር ተወያዩ።

በጣሊያን ጠቅላይ ኢታማዦር ሹም አድሚራል ጁሴፔ ቻቮ የተመራ ልዑክ መከላከያ ጠቅላይ መምሪያ ሲደርስ በጦር ሃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ እና በጀነራል መኮንኖች አቀባበል ተደርጎለታል።

የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ ከጣሊያን ጠቅላይ ኢታማዦር ሹም አድሚራል ጁሴፔ ቻቮ ጋር ሁለቱ ሀገራት በወታደራዊ ትብብር ዙሪያ አብረው ለመስራት የሚያስችላቸውን ውይይት አድርገዋል።

እንደ ኢዜአ ዘገባ፤ በሌላ መልኩም ሁለቱ ሀገራት ያላቸውን መልካም ግንኙነት ማጠናከርና በጋራ መስራት በሚያስችላቸው ጉዳይ ዙሪያ ተወያይተዋል።

አምባሳደር ታዬ አጽቀሥላሴ ከማዕከላዊ አፍሪካ ሪፐብሊክና ፖርቱጋል ውጭ ጉዳይ ሚኒስትሮች ጋር ተወያዩ
******
(ኢ ፕ ድ)

የውጭ ጉዳይ ሚኒስትር አምባሳደር ታዬ አጽቀሥላሴ ከማዕከላዊ አፍሪካ ሪፐብሊክ ውጭ ጉዳይ ሚኒስትር ሲልቪ ባይፖ- ተሞን ጋር በሁለትዮሽና ቀጣናዊ ጉዳዮች ዙሪያ ተወያይተዋል።

በተመሳሳይ ከፖርቱጋል ውጭ ጉዳይ ሚኒስትር ጃኦ ጎሜዝ ክራቪኝዎ ጋር በሁለትዮሽ እና ዓለም አቀፋዊ ጉዳዮች ዙሪያ መክረዋል።

አምባሳደር ታዬ ኢትዮጵያ ከፖርቱጋል ጋር በቱሪዝም ፣ትምህርት፣ በንግድና ኢንቨስትመንት ዘርፎች ተባብራ መስራት ትፈልጋለች ብለዋል።

የፖርቹጋሉ ሚኒስትር በበኩላቸው አገራቸው የፕሪቶሪያ የሰላም ስምምነት ትግበራን እንደምትደግፍ መግለጻቸውን የውጭ ጉዳይ ሚኒስቴር መረጃ ያመለክታል።

የካቲት 06 ቀን 2016 ዓ.ም

37ኛውን የአፍሪካ ህብረት የመሪዎች ጉባኤ የሚታደሙ እንግዶች የዓድዋ ድል መታሰቢያን ጎበኙ
***************
(ኢ ፕ ድ)

በ37ኛው አፍሪካ ህብረት የመሪዎች ጉባኤ ለመታደም አዲስ አበባ የገቡ የተለያዩ ሀገራት አምባሳደሮች፣ዲፕሎማቶችና የዲፕሎማቲክ ማህበረሰብ አባላት የዓድዋ ድል መታሰቢያ ሙዚየም ጎብኝተዋል።

የኢፌዴሪ ውጭ ጉዳይ ሚኒስትር አምባሳደር ታዬ አጽቀስላሴን ጨምሮ ከፍተኛ የመንግስት ስራ ሃላፊዎች እንግዶችን በመቀበል ጉብኝቱን መርተዋል።

የዓድዋ ድል መታሰቢያ በኢፌዴሪ ፕሬዚዳንት ሣህለወርቅ ዘውዴ ፣ ጠቅላይ ሚኒስትር ዐቢይ አሕመድ (ዶ/ር) እና ሌሎች ከፍተኛ የመንግሥት ባለሥልጣናት በተገኙበት በሳለፍነው እሑድ መመረቁ ይታወቃል።

የዓድዋ ድል መታሰብያ ሙዚየም ኢትዮጵያውያን ከ128 ዓመታት በፊት ለቅኝ ግዛት የመጣውን የጣልያን ወራሪ ኃይል በአንድነት መክተውና አሸንፈው ነፃነታቸውን ያስከበሩበት እና ለጥቁር ሕዝቦች ሁሉ የነፃነት ምልክት መሆን ያስቻሉ የድሉ መሪዎች፣ የጦርነቱ ተሳታፊዎችና ሌሎች ታሪካዊ እውነታዎች በአንድ ላይ የተገለጡበት ነው።

በአዲሱ ገረመው

የካቲት 6 ቀን 2016 ዓ.ም