የኢፌዲሪ ጠቅላይ ሚኒስትር ዐቢይ አሕመድ (ዶ/ር) በደቡብ ኢትዮጵያ ክልል ጎፋ ዞን ገዜ ጎፋ ወረዳ ኬንቾ ቀበሌ በመሬት መንሸራተት አደጋ ጉዳት የደረሰባቸው ወገኖችን አደጋው በደረሰበት ሥፍራ በመገኘት አጽናንተዋል፡፡
ሐምሌ 201 ቀን 2016 ዓም

የተባበሩት አረብ ኤሚሬትስ በመሬት ናዳ ጉዳት ለደረሰባቸው ወገኖች 75 ቶን ምግብ ነክና ሌሎች ቁሳቁሶችን ድጋፍ አደረገች
****
(ኢ.ፕ.ድ)

- አደጋው ከደረሰ ጀምሮ 60 ሚሊዮን ብር የሚገመት የዓይነትና የገንዘብ ድጋፍ ተደርጓል

የተባበሩት አረብ ኤሚሬትስ በጎፋ ዞን ገዜ ጎፋ ወረዳ ኬንቾ ቀበሌ በመሬት ናዳ አደጋ ጉዳት ለደረሰባቸው ወገኖች 75 ቶን ምግብ ነክና ሌሎች ቁሳቁሶችን ድጋፍ ማድረጓን የመንግስት ኮሚኒኬሽን አገልግሎት አስታወቀ።

አደጋው ከደረሰ ጀምሮ 60 ሚሊዮን ብር የሚገመት የዓይነትና የገንዘብ ድጋፍ መደረጉም ተመላክቷል።

የመንግስት ኮሚኒኬሽን አገልግሎት ሚኒስትር ዴኤታ ሰላማዊት ካስ በደቡብ ኢትዮጵያ ክልል ጎፋ ዞን ገዜ ጎፋ ወረዳ ኬንቾ ቀበሌ በመሬት ናዳ አደጋ ጉዳት የደረሰባቸው ወገኖችን ለመደገፍ እየተሰሩ ያሉ ስራዎችን አስመልክተው መግለጫ ሰጥተዋል።

በመግለጫውም የመሬት ናዳ አደጋው መድረሱ ከተሰማ ጊዜ ጀምሮ ጉዳት የደረሰባቸውን ወገኖች የማጽናናት፣ ድጋፍ የማድረግ እና ሌሎች ስራዎች ሲሰሩ መቆየታቸውን አስታውቀዋል።

በዛሬው ዕለት የተባበሩት አረብ ኤሚሬትስ በመሬት ናዳ ጉዳት ለደረሰባቸው ወገኖች ድጋፍ የሚሆን 75 ቶን ምግብ ነክና ሌሎች ቁሳቁሶችን መላኩንና ቦሌ ዓለም አቀፍ አየር ማረፊያ መድረሱን ገልጸው፤ የኢትዮጵያ አደጋ ስጋት ኮሚሽን ተረክቦ በቀጥታ ጉዳት ለደረሰባቸው ወገኖች ይላካል ብለዋል።

በሌላ በኩል በክልሎች፣ በከተማ አስተዳድሮች፣ በአጋር ድርጅቶች፣ በባለሀብቶች፣ በግለሰቦች እና በሌሎች ባለድርሻ አካላት ያደረጉት ድጋፍ በዓይነትና በገንዘብ ሲተመን 60 ሚሊዮን መሆኑን ተናግረዋል።

በሔለን ወንድምነው
ሐምሌ 20 ቀን 2016 ዓ.ም