የጠቅላይ ሚኒስትር ዐቢይ አሕመድ (ዶ/ር) መልዕክት ‼️
በምስሎቹ የምንመለከተው በመልማት ላይ ያለ የሻይ ተክል ማሳ ነው። በቡና ያሳካነውን አመርቂ ድል በሻይ ምርትም እንደግመዋለን።

የሚኒስትሮች ምክር ቤት በ38ኛ መደበኛ ስብሰባው የተለያዩ ውሳኔዎችን አሳለፈ
**********
(ኢ.ፕ.ድ)

የሚኒስትሮች ምክር ቤት በዛሬው ዕለት ባካሄደው 38ኛ መደበኛ ስብሰባው ዓለም ዐቀፍ የልማት ማህበር ጋር የተደረገውን የፋይናንስ ድጋፍ ስምምነት ለማፅደቅ በተዘጋጀው አዋጅ ላይ ተወያይቶ ውሳኔ አሳለፈ፡፡

ከዓለም ዐቀፍ የልማት ማህበር ጋር የተደረገው የፋይናንስ ድጋፍ ስምምነት የ1.5 ቢሊዮን የአሜሪካ ዶላር የሚያስገኝ ሲሆን ከዚህ ውስጥ 1 ቢሊዮን የአሜሪካ ዶላር በእርዳታ፣ 500 ሚሊዮን የአሜሪካ ዶላር ደግሞ በብድር መልክ የተገኘ ነው፡፡

የፋይናንስ ድጋፉ የኢትዮጵያ መንግሥት የማክሮ ኢኮኖሚውን ለማረጋጋት የጀመራቸውን የሪፎርም ሥራዎች ለማስፈጸም በተለይም ለሥራ ፈጠራ፣ የዋጋ ግሽበትን ለመቆጣጠር፣ የውጭ ምንዛሪ እጥረትን ለመቅረፍ፣ የመዋቅር ማስተካከያ ለማድረግ እንዲሁም የፌደራል መንግሥት የ2ዐ17 ዓ.ም በጀትን በቀጥታ ለመደገፍ የሚውል ነው፡፡

የሚኒስትሮች ምክር ቤት በሰነዱ ላይ ከተወያየ በኋላ ብድሩ ከወለድ ነፃ ፣ የ6 ዓመት የችሮታ ጊዜን ጨምሮ በ38 ዓመታት ውስጥ ተከፍሎ የሚጠናቀቅ እንዲሁም ከአገራችን የብድር አስተዳደር ስትራቴጂ ጋር የሚጣጣም መሆኑን በማረጋገጥ ስምምነቱን አጽድቆ ለህዝብ ተወካዮች ምክር ቤት እንዲተላለፍ በሙሉ ድምጽ ወስኗል።
ሐምሌ 24 ቀን 2016 ዓ.ም

በአዲሱ የውጪ ምንዛሬ አስተዳደር ስርአት ዙሪያ ከአምራች ኢንዱስትሪ ባለቤቶችና የዘርፍ ማህበራት ተወካዮች ጋር ውይይት ተካሄደ
****************
(ኢ.ፕ.ድ)

በአዲሱ የውጪ ምንዛሬ አስተዳደር ስርአት ዙሪያ ከአምራች ኢንዱስትሪ ባለቤቶችና የዘርፍ ማህበራት ተወካዮች ጋር ውይይት መካሄዱን የኢንዱስትሪ ሚኒስቴር አስታወቀ፡፡

ውይይቱን ላይ የኢንዱሰትሪ ሚኒስትር ዴኤታ አቶ ታረቀኝ ቡሉልታ ስለ አዲሱ የውጪ ምንዛሬ አሰተዳደር ስርአት ገለፃ ሰጥተው ለአምራች ኢንዱስትሪ ዘርፉ አበረታች እንደሆነ አንስተዋል።

የአምራች ኢንዱስትሪ ባለቤቶችና የዘርፍ ማህበራት ተወካዮች እንደአገር የማክሮ ኢኮኖሚ ስብራቶችን ለመጠገን ከተወሰዱ ማሻሻያዎች መካከል የውጪ ምንዛሬ በገበያ እንዲመራ የማድረግ ስርአት አስፈላጊ እንደሆነም አንስተዋል።

በቂ የሆነ የዉጪ ምንዛሪ ክምችትና አቅርቦት ከመኖሩ ጋር በተያያዘ፣ በምርቶች ላይ ስለሚኖር እጥረትና የዋጋ ጭማሪ ፣ የተዘረጋው ስርአት መስመር ከማስያዝ አንጻር በመንግስት በኩል የተደረጉ የቅድመዝግጅት ስራዎች ፣በዘርፉ የተለያየ የታሪፍ ሰርአት መኖሩና የአደረጃጀት ችግሮች ያሉበት መሆኑ እና ሌሎችም በስጋት የሚሆኑ ነገሮች በውይይቱ ላይ ተነስተዋል።

ከመጀመሪያው የማክሮ ኢኮኖሚ ማሻሻያ ጀምሮ በመንግስት በኩል አስፈላጊው ዝግጅት መደረጉን የገለፁት የኢንዱስትሪ ሚኒስትር ዴኤታ አቶ ታረቀኝ የአምራች ኢንዱስሪው ዘርፍ በአገራዊ የኢኮኖሚ እድገት ላይ የሚያበረክተውን አስተዋጽኦ ለማሳደግ መንግስት የጀመራቸውን ድጋፍ አጠናክሮ ይቀጥላልም ብለዋል፡፡
የዘርፉ ተዋናዮችም የበኩላቸው ሚና እንዲወጡ ጥሪ ማስተላለፋቸውን ከሚኒስቴሩ ያገኘነው መረጃ ያመላክታል፡፡

ጋርዲያን ሽልድ የኤሌክትሪክ ማከፋፈያ ከገበያ ታገደ
**********
(ኢ.ፕ.ድ)
ከደረጃ በታች የሆነ እና ምንጩ ያልታወቀ ጋርዲያን ሽልድ የኤሌክትሪክ ማከፋፈያ በገበያ ላይ እንዳይውል መታገዱን የንግድና ቀጣናዊ ትስስር ሚኒስቴር አስታወቀ፡፡

የንግድና ቀጣናዊ ትስስር ሚኒስቴር ባካሄደው የገበያ ኢንስፔክሽን ጋርዲያን ሽልድባለ 6 ቀዳዳ outlet for የኤሌክትሪክ ማከፋፈያ ከጥራት ደረጃ በታች መሆኑ ስለተረጋገጠ እና ምንጩ ያልታወቀ ሆኖ በመገኘቱ ገበያ ላይ እንዳይውል ታግዷል፡፡

ሚኒስቴር መስሪያ ቤቱ ይህንን ምርት ህብረተሰቡ እንዳይጠቀም እያሳሰበ ማንኛውም ነጋዴ ሲሸጥ ቢገኝ ከፍትህ ተቋማት ጋር በመቀናጀት አስፈላጊውን ህጋዊ እና አስተዳደራዊ እርምጃ እንደሚወስድ መግለፁን ከሚንስቴሩ ያገኘነው መረጃ ያመላክታል፡፡
ሐምሌ 24 /2016 ዓ.ም

በቅርብ ጊዜ ለተሾሙት አምባሳደሮች ላለፉት ሳምንታት ሲካሄድ የነበረውን ስልጠና ተከትሎ ዛሬ ጠቅላይ ሚኒስትር ዐቢይ አሕመድ በጽሕፈት ቤታቸው አምባሳደሮቹን አግኝተዋል።

ሐምሌ 24 ቀን 2016 ዓ.ም