ጊዜው የሚጠይቀው አርበኝነት ለሙያ እና ሙያተኛ ክብር መስጠት መሆኑን የስራና ክህሎት ሚኒስትር ገለጹ
- የትርክት መዛባት የቴክኒክና ሙያ ዘርፉን ጎድቶታትል ብለዋል

****

(ኢፕድ)

ጊዜው የሚጠይቀው አርበኝነት ለሙያ እና ሙያተኛ ክብር መስጠት መሆኑን የሥራና ክህሎት ሚኒስትር ወይዘሮ ሙፈሪሃት ካሚል ገለጹ። የትርክት መዛባት የቴክኒክና ሙያ ዘርፉን እንደጎዳውም ተናግረዋል።

የሥራና ክህሎት ሚኒስትር ሙፈሪሃት ካሚል ባደረጉት የማጠቃለያ ንግግር እንደገለጹት፤ ክህሎት በህብረት እና በአንድነት ሆነን ሀገር የምንሰራበት መንገድ ነው፡፡

ጊዜው የሚጠይቀው አርበኝነት ለሙያ እና ሙያተኛ ክብር መስጠት መሆኑን ገልጸው፤ ዜጎች ወርቃማ እጃቸውን ብሩህ አዕምሯቸውን ተጠቅመው የሚያደርጉት የችግር ፈቺነት ተግባር አርበኝነት ነው ብለዋል።

አሁን ያለንበት ወቅት የተዛቡ ትርክቶችን የምንጋፈጥበት ሲሆን፤ ከተዘቡ ትርክቶች አንዱ በሙያ እና ሙያተኞች ያለው ግንዛቤ መሆኑን ገልጸዋል፡፡

የተዘባ ትርክትን ለማስተካከል በኮሚኒኬሽንና በተግባር አሰናስሎ በማስኬድ ተቀራርቦ መስራት እንደሚገባ አጽንኦት ሰጥተዋል፡፡

አይቻልም፣ አይሆንም አትንካ የሚሉት ጉዳዮች የፈጠራን በር የሚዘጉ በመሆናቸው፤ ልጆችን ከልጅነታቸው ጀምሮ ለፈጠራ ያላቸውን ሀሳብ በመደገፍና በማበረታት ማሳደግ እንደሚገባ ተናግረዋል፡፡

ምርታማነት ለማሳደግ እና ዘላቂነት ያለው ኢኮኖሚ ለመገንባት ክህሎት መግቢያ በር መሆኑን አመላክተዋል፡፡

ክህሎት ችግር ፈቺና መፍትሄ አመንጪ ነው ያሉት ሚኒስትሯ፤ እያንዳንዱ አምራች ኢንዱስትሪ የሚፈልገውን ብቁ የሰው ኃይል ለመገንባት በትብብር መስራት ይገባል ነው ያሉት፡፡

ኢንዱስትሪዎች የሚፈልጓቸው አዳዲስ የስልጠና መስኮች እንዳሉ ገልጸው፤ ትብብርን በማጠናከር ፍላጎት መር የሰው ሃይል ለማቅረብ ይሰራል ብለዋል፡፡

በልምድ እውቀትና ክህሎት ያገኙ ሰዎች እውቅና የሚያገኙበት ስርዓት በተያዘው ዓመት ይፋ መሆኑን አስታውቀዋል፡፡

ልንከባከበውና ልንጠብቀው የሚገባ ሀገር በቀል እውቀቶች እንዳሉ ገልጸው፤ 26 የሚደርሱ ሀገር በቀል እውቀቶች ተለይተው ካሪኩለም ተቀርጾላቸዋል ሲሉ አንስተዋል፡፡

በቀጣይም በሀገር በቀል እውቀቶች የማሻሻያ ስራዎች የሚሰራ ሲሆን፤ ይህም ሙያና ሙያተኞችን ለማክበር ጉልህ ሚና አለው ብለዋል፡፡

በሌላ በኩል አዲስና ነባር ቢዝነሶችን ማጣመር እና ስታርት አፖችን ማጠናከር የግድ እንደሚል ጠቁመዋል፡፡
ኢትዮጵያን ከፍ ማድረግ የሚቻለው ስራን በክህሎት ሲመራ በመሆኑ ያለንን እውቀት ያለምን ቁጠባ ሀገር ላይ ኢንቨስት እናድረግ ብለዋል፡፡

ኢትዮጵያ እያሸነፈች ትሻገራለች ምንም ጥርጥር የለውም ሲሉ መልዕክታቸውን አስተላልፈዋል፡፡


በሄለን ወንድምነው

“የባሕር በር ጥያቄ የኢኮኖሚ ብቻ ሳይሆን የህልውና ጉዳይ ነው”- ዕምሩ ገመቹ (ዶ/ር)
*****
(ኢ ፕ ድ)

የኢትዮጵያ የባሕር በር ጥያቄ የኢኮኖሚ ብቻ ሳይሆን፤ የህልውና ጉዳይ መሆኑን በሀሮማያ ዩኒቨርሲቲ የፖለቲካና ዓለም አቀፍ ግኑኙነት መምህር እምሩ ገመቹ (ዶ/ር) ገለጹ፡፡

የሌላ ሀገር ወደብ መጠቀም ከድንገተኛ ቀውሶች ጋር በተያያዘ ዋስትና እንደማይኖረውም አስታውቀዋል።

እምሩ ገመቹ (ዶ/ር) ለኢፕድ እንዳስታወቁት፤ ሀገሪቱ ያለችበት የቀይ ባሕርና የህንድ ውቂያኖስ አካባቢ ካለው ጂኦፖለቲካል ስትራቴጂክ አኳያ፤ በርካታ ሀገራት አካባቢውን የመቆጣጠር ፍላጎት አላቸው፤ ይህም እንደ ሀገር የደህንነት ስጋት ይዞ ሊመጣ የሚችል ነው።

ሀገሪቱ የባሕር በር ባለቤት ብትሆን ፤ ብሄራዊ ጥቅሟን ከማስጠበቅ በተጓዳኝ የአካባቢውን ሰላም ለማስጠበቅ የሚኖራት አበርክቶ ከፍ ያለ እንደሚሆን የጠቆሙት መምህሩ፤ በዓለም አቀፍ መድረክ የሚኖራት ተደማጭነትን ይጨምራል።

የኢንቨስትመንት ስበት በመፍጠር ባለሀብቶች በኢትዮጵያ እንዲያለሙ መደላድል ይፈጠራል፤ የተለያዩ ድጋፎችን እንድታገኝ ይረዳል፤ ይህም ብሄራዊ ጥቅሟን ከማስጠበቅ አንጻር አስተዋጽኦ ይኖረዋል። https://press.et/?p=147260

ዓለሙ ስሜ (ዶ/ር) በተባበሩት መንግስታት የመንገድ ደህንነት ፈንድ የቦርድ አባል ሆነው ተሾሙ
*****
(ኢ ፕ ድ)
የትራንስፖርት እና ሎጂስቲክስ ሚኒስትር ዓለሙ ስሜ (ዶ/ር) በተባበሩት መንግስታት የመንገድ ደህንነት ፈንድ (ዩኤንአርኤስኤፍ) የቦርድ አባል ሆነው ተሾመዋል፡፡

ኢትዮጵያ ሀገራዊ የመንገድ ደህንነት ስትራቴጂ በመቅረፅና የመንገድ ደህንነት ትምህርት በስርዓተ ትምህርት ውስጥ እንዲካተት በማድረግ የወሰደችው እርምጃ የመንገድ ደህንነትን ለማስፈን ያላትን ቁርጠኝነት ማሳያ መሆኑን ለሚኒስትሩ በተፃፈው የሹመት ደብዳቤ ተገልጿል፡፡

በኮሪደር ልማት ፕሮጀክት ስራዎች የተገነቡ ምቹ የብስክሌትና የእግረኛ መንገዶች እንዲሁም የተሻሻሉ የመንገድ ትስስር ስራዎች እንደ ሀገር የትራንስፖርት መሰረተ ልማት ቅንጅትን የሚያሳድጉ መሆናቸውም በደብዳቤው ተጠቁሟል፡፡

የአፍሪካ ኢኮኖሚ ኮሚሽን ኢትዮጵያ በመንገድ ደህንነት ላይ ያላትን ቁርጠኝነትና የምታደርገውን ጥረት በመገንዘብና እውቅና በመስጠት ዓለሙ ስሜን (ዶ/ር) በዩኤንአርኤስኤፍ ስር የባለአደራዎች ቦርድ የቦርድ አባል ሆነው መሾማቸውን አሳውቋል፡፡

የሚኒስትሩ በቦርድ አባልነት መሾም ኢትዮጵያ ልምዷን ለሌሎች ሀገራት እንድታጋራና ከመላው ዓለም በመንገድ ደህንነት ላይ የተሻሉ ተሞክሮዎችን እንድታገኝ መልካም አጋጣሚ የሚፈጥር ነው ተብሏል።

ዩኤንአርኤስኤፍ በፈረንጆቹ 2018 ሚያዚያ ወር ላይ የተመሠረተ ሲሆን በዓለም አቀፍ ደረጃ ከፍተኛ ጠቀሜታ ላላቸው ፕሮጀክቶች ተጨማሪ ገንዘብ የማሰባሰብ እና የመደገፍ ስራን የሚሰራ ተቋም እንደሆነም የትራስፖርትና ሎጂስቲክስ ሚኒስቴር መረጃ ያመላክታል፡፡

መጋቢት 3 ቀን 2017 ዓም