Першы Беларускі Бізнэс Форум у Вашынгтоне.

1-га сакавіка ў Нацыянальным Прэс Клубе ў Вашынгтона, Акруга Калюмбія, прайшоў Першы Беларускі Бізнэс Форум, арганізаваны Асацыяцыяй Беларускага Бізнэсу за Мяжой (ABBA) пры партнэрстве з Дэпартаментам гандлю ЗША, Асацыяцыяй Беларусаў у Амэрыцы (ABA) , Беларуска-Амэрыканскім Задзіночаньнем, Акруга Калюмбія (BAZA, DC)

Вядоўцамі бізнэс-форума былі Прэзідэнтка АБА Ганна Шарко і сябар Галоўнай Управы АБА з суполкі Вашынгтона, АК Павел Васілёнак.

Сярод гасьцей форума былі прадстаўнікі федэральных структур ЗША і Сусьветнага Банка, уладальнікі маленькага і вялікага бізнэсу ў ЗША і Канадзе, экспэрты ў фінансавай галіне, дзеячы культуры, актывісты розных беларуска-амэрыканскіх суполак і прадстаўнікі канадска-беларускай арганізацыі Belarusian Canadian Alliance / Згуртаваньне Беларусаў Канады, а таксама дабрачынных арганізацый такіх як BYSOL і ініцыятыва INeedHelpBy.
Гасьцямі форуму былі і сябры Галоўнай Управы АБА з Нью-Ёрка, Вашынгтона АК, Чыкага, Нью Джэрзі, Філядэльфіі, Сан Францыска, Сан Дыега, і Тампы.

Падчас форуму абмяркоўваліся патрэбы беларускага бізнэсу і фармаваньне бізнэс-супольнасьці за мяжой. Дэпартамент гандлю ЗША выразіў зацікаўленасьць у росьце беларуска-амэрыканскага бізнэсу і гатоўнасць аказваць падтрымку. Таксама ўдзельнікі панэляў падкрэслілі значэньне беларускай ідэнтычнасьці ў бізнэсе, абмеркавалі пытаньні фінансавых рэсурсаў і інвестыцый, уплыву бізнэсу на развіцьцё моцнай дыяспары і наадварот.
У апошняй натхняльнай панэлі, неаднаразова прагучалі ідэі, што варта сябе абазначаць і будаваць сувязі для супрацоўніцтва, што важна падтрымліваць беларускіх партнэраў па бізнэсу, каб разам расьці.

Каманда АБА дзякуе ўсім арганізатарам і удзельнікам за цудоўную магчымасьць сабрацца разам, пазнаёміцца, абмеркаваць актуальныя пытаньні і ўзмацніць адносіны паміж беларускай дыяспарай ЗША і іншага замежжа.

8 сакавіка адзначаецца Міжнародны дзень салідарнасьці жанчын у барацьбе за свае правы.

І ў гэты дзень мы хочам ушанаваць памяць усіх выбітных беларускіх жанчын, якія пакінулі сьлед у гісторыі Беларусі. А таксама падзякваць тым, хто робіць свой унёсак у змаганьне за свабоду ў Беларусі і ў развіцьцё беларушчыны. І, канешне, выказаць сваю салідарнасьць усім палітзьняволеным жанчынам.

Каб таксама выказаць сваю салідарнасьць, у гэты дзень вы можаце:
🔻 Падзяліцца ў сваіх сацсетках гісторыямі беларускіх жанчын з мінулага ці нашых дзён, якія вас натхняюць
🔻 Расказаць пра факты дыскрымінацыі супраць жанчын як у Беларусі так і па ўсяму сьвету
🔻 Расказаць пра беларускіх палітзьняволеных жанчын
🔻Падтрымаць жанчын-палітвязьняў з дапамогай адной з ініцыятыў:
🔸Падпісацца на старонку Politvyazynka
Ці ахвяраваць любую суму на гэты праэкт
🔸Падтрымаць збор АВВА і Bysol для палітзьняволеных беларусак
🔸 Адправіць паштоўку з дапамогай сэрвіса Майстэрня паштовак салідарнасьці

У Дзень жаночай салідарнасьці жадаем падзяліцца гісторыяй, а таксама падтрымаць Волю Дземку, якая натхняе нас сваёй працай на карысьць беларушчыны!
https://gofund.me/ebf828f6
Воля Дзёмка - рэжысёрка і сцэнарыст фільма пра беларускія народныя песьні https://www.belarusian-songs.com/; яна заснавальніца фальклёрнага гурта VOLYA у Сіэтле; яна аўтарка і фатограф 2х каталёгаў беларускіх традыцыйных строяў, https://volya.weebly.com/album-2022.html якія ж яна сама сабрала і рэканструіравала.

Воля некалькі год змагаецца з аўтаімуннай хваробай.
Паміж бясконцымі хіміятэрапіямі яна пасьпявае ладзіць імпрэзы, кансультаваць, вышываць і майстраваць строі, дапамагаць беларусам і ўкраінцам, і заставацца пазытыўнай.

Зараз сяброўкай Волі адчынены збор дапамогі ёй фінансавымі сродкамі для прадаўжэньня яе барацьбы.

Давайце будзем салідарнымі і падтрымаем Волю як можам.

Для тых, хто ў Беларусі: калі ласка, не каметуйце і не пакідайце рэакцый на гэты пост. Бо медыя АБА ўнесены ў сьпіс «экстрэмісцкіх матэрыялаў» у Беларусі.

https://gofund.me/ebf828f6